Tengo que confesar qu’hasta va poco tenía una idea mui enquivocada sobre Raffaella Carrà, ye dicir, Raffaella Roberta Pellon, como en realidá se llamaba. De neña estudió con unes monxes mui estrictes nel sofisticáu Colexu Español de Bologna y a los 9 yá debutó nel cine, anque pasaríen unos años enantes de que colara pa Hollywood. Daquella yera morena, nun tenía flequillu, pero sí gastaba una estética a lo Sofía Loren. A lo cabero, refugó facer una carrera nun llugar onde «cuando terminaben de rodar, diben toos a alcoholizase o a tomar cocaína» porque, tal como-y dicía so pá, aquella xente tan raro diba llevala pel camín de la perdición.
Eso sí, animóse a cambiar l’estilismu, tiñóse rubia platinu, vistió ropa de colores estridentes d’un estilismu imposible, enforma futurista, y centróse en cantar unes lletres festives qu’a muncha xente, yo incluyida, paecíennos intrescendentes porque nun afondamos nel so conteníu. Ensin dulda la puesta n’escena fue terriblemente discotequera, dalgo qu’aseguraba l’ésitu. El casu ye que’l Vaticano dempués de ver el vídeo «Tuca Tuca», onde fai un «movimientu sexi» qu’agora paez casi infantil, consideróla censurable dafechu y determinó qu’aquella moza yera un peligru públicu pa la moral y les bones costumes.
Con estes referencies, Raffaella aterrizó n’España pa cantar nun programa de televisión en 1975, acabante morrer el dictador Francisco Franco. Ye verdá que la situación de la muyer española meyorare dalgo a partir d‘esi añu, n’especial «la situación xurídica de la muyer casada y los derechos y deberes de los cónyuxes», impulsada polos cambeos de caláu nel Códigu Civil y nel Códigu de Comerciu. Desaniciaron bona parte de les llimitaciones na capacidá d'obrar que sufríen les casaes qu’hasta esi momentu taben obligaes a obedecer al home: yá nun teníen que pidir permisu pa comparecer en xuiciu, podíen tener bienes, disponer de la so herencia, magar l'alministración de los gananciales siguiere correspondiendo al home.
Asina y too esti cambéu nun va dexar a les muyeres disponer del total del so sueldu, de les sos rentes, al tiempu que’l so home, que facía la función d’alministrador, entá podía vender ensin el so consentimientu. Paezme que, anque yera italiana, tal como taben les coses, quitáronse-y pa siempres les ganes de casase, si dalguna vegada les tuvo. Raffaella dicía que na vida ye necesaria «la llibertá d’equivocase, la llibertá de vivir y la llibertá d'amar, en tolos sentíos». Y esta muyer que defendió la llibertá na sociedá puritana italiana y na sociedá primida española abanderó con allegría y ensin complexos el feminismu. Ye conocida la so llucha p’acabar cola brecha salarial. Ella mesma llogró contratos iguales que los de los homes, dalgo bien raro nunos momentos nos qu'en tolos trabayos reinaba la desigualdá.
Anque Francis Franco llegó a dicir qu’a dalgunos de los ministros de so güelu-y «gustaben los señores», la cárcel y el psiquiátricu yeren les «cures» que’l réxime franquista ufiertaba a los homosexuales. Tuvieron que pasar tres años dende que Raffaella vieno per primera vez a cantar a España pa que’l gobiernu d’Adolfo Suárez acabase cola Llei de Peligrosidá Social y Rehabilitación. Raffaella nun tuvo reparos en cantar a lo cabero de los 70 sobre un mozu de pelo d'oru al que quería casi con llocura, al que fue tan fiel como a naide-y fuere y al qu’una tarde dende la so ventana, viólu «abrazáu a un desconocíu».
Chocó una lletra tan «aperturista» nuna sociedá qu’entá nun cortare los venceyos cola dictadura franquista. Estos xestos ayudaron a normalizar la situación d’un colectivu que sufrió muncho porque a lo llargo de 40 años el réxime considerólos vagos, maleantes y peligrosos. Y la defensa que siguió colos años. Raffaella implicóse en 2017 nun actu nel que foi nomada «reina del Arguyu» y na que se sorprendió de «qu’a estes altures tuviéremos que reclamar estos derechos». Pa una muyer que votaba al comunismu debió ser doloroso ver como nos últimos años diba normalizándose’l discursu del odiu pola presencia mediática de la estrema derecha.
A lo llargo d’esta selmana alcordéme de dalgunos cantares de la esplosiva diva italiana y dime cuenta de que dalgunes lletres como Caliente, caliente, qu’escandalizó a los más conservadores pol conteníu sexual, valdría agora pa describir la situación na que podrá tar cualquier llugar del planeta debío al calor estremo. Nun mes de xunu que batió récords de calor, y llamentablemente nun foi pol cantar, lo que provocó que millones de muxones y amasueles apaecieren cocíos en plena sablera pola fola de calor en Canadá provocada pol calentamientu del Polu Norte.
El cantar Fiesta valdría pa recordanos qu’entá nun podemos celebrar el trunfu sobre l’andancia y Rumores serviría pa la situación que vivimos n’España pol cambéu del gobiernu. El casu ye que cuando llegó Raffaella a España los más de cien ministros que tuvieren nel poder yeren homes; agora ensin embargu creció'l pesu de les muyeres nel Executivu de coalición. La selmana pasada ficieron la foto de familia, catorce ministres, frente a los ocho ministros y el presidente, asitien a la cuota femenina al 63 per cientu, dalgo que Raffaella nun vio pero que toi segura nun imaxinó en 1975.
Na España franquista de 1942 dicíase na Enciclopedia escolar de dibuxos que yera inmoral, una vergoña, una ofiensa, una deshonra ver a una muyer de llabios encarnaos fumando. Raffaella, que dixo nun ser drogadicta nin ninfómana, confesó dos vicios: el café y el tabacu. Dende llueu foi una ofiensa que’l fumar acabare cola vida d’una muyer inimitable que supo poner color a una España negra que despertaba adulces de la velea de la dictadura.