La esposición ¿A qué xugamos?, con una selección de pieces d'ente principios del sieglu XX y los años 80, va poder visitase hasta'l 30 de setiembre nel muséu etnográficu Pepe'l Ferreiro
19 jul 2021 . Actualizado a las 13:04 h.El Muséu Etnográficu de Grandas de Salime Pepe'l Ferreiro acueye la esposición ¿A qué xugamos? del 20 de xunetu al 30 de setiembre, na que se propón un percorríu pela hestoria d'Asturies dende principios del sieglu XX hasta los años ochenta al traviés de fotografíes, xuegos y xuguetes que reflexen l'aspectu lúdicu de la infancia na cai, na sablera, nel parque, el día de Reis o en tiempos de guerra.
L'amuesa inclúi 46 fotografíes antigües de los fondos del Muséu del Pueblu d’Asturies y del Muséu del Ferrocarril d'Asturies, dellos paneles esplicativos y un audiovisual con otres 46 semeyes. L'amuesa compleméntase con una selección de xuegos y xuguetes de los fondos del propiu Muséu Etnográficu, dalgunos de los cualos amuésense al públicu per primer vegada.
¿A qué xugamos?, con accesu gratuitu cola entrada al muséu, podrá visitase nel horariu d'apertura del centru: de martes a sábadu, de 11.00 a 18.00 hores; domingos y 8 de setiembre, de 11.00 a 15.00 hores; y llunes, zarráu.
Esti branu'l muséu tamién programó visites guiaes sobre horros, paneres y cabazos los miércoles de xunetu y agostu en castellán, a les 12.00 hores, y los xueves, n'eonaviegu, a la mesma hora.
Tamién va haber demostraciones de tornería con Arturo Iglesias pa conocer el funcionamientu del tornu de media vuelta y les pieces que nél se fabricaben de martes a vienres hasta'l 15 de setiembre, de 11.00 hores hasta 15 minutos antes del pieslle. Amás, de la mano de l'Asociación d'Amigos del Muséu hai xuegos tradicionales el 24 de xunetu y el 7 y 21 d'agostu, de 16.00 a 17.45 hores, na que'l públicu de toles edaes puede probar los zancos, tirar la peonza o rodar los aros.