L'escritor Juan José Millás ufierta una charra nel teatru Palacio Valdés d'Avilés

G. G. REDACCIÓN

AGORA

Juan José Millás
Juan José Millás

L'aforu va tar llendáu y les entraes yá se pueden acutar

21 jul 2021 . Actualizado a las 16:59 h.

L'escritor Juan José Millás ufierta'l xueves 29 de xunetu una conferencia sobre lliteratura y cine nel teatru Palacio Valdés d'Avilés a partir de les 19.30 hores, con aforu llendáu y midíes de seguranza frente a la pandemia de COVID-19. Les entraes, gratuites, pueden acutase nesti enllaz. https://invitacionesavilescultural.es

L'alcuentru de Millás col públicu enmárcase nes diverses actividaes previstes pa esti mes pola Cátedra de Cine frutu de la collaboración ente la Universidá d'Uviéu y el Conceyu d'Avilés, dientro del cursu de branu tituláu Cineastes y músicos. Les afinidaes electives, que se ta celebrando esta selmana.

Según recuerden dende'l conceyu, Millás ye ún de los intelectuales con más discursu, percorríu ya influencia nel panorama lliterariu, periodísticu y social na España del nuestru tiempu, y que sabe, en primer persona, de les complexes relaciones ente lliteratura y cine.

Nos sos cuarenta y seis años de carrera ganó diversos premios como'l Nacional de Lliteratura, el Nacional de Periodismu Miguel Delibes, el Planeta, el Nadal, la Primavera. Amás, dende 2007, Juan José Millás ye Doctor honoris causa pola Universidá d'Uviéu.

L'escritor valencianu va tar acompañáu pola directora y el subdireutor de la Cátedra de Cine, Magdalena Cueto y José Ángel Lázaro, respectivamente.