Correos va instalar dos «máquines autoserviciu» n'Uviéu y Xixón pal depósitu de paquetes

G.G. REDACCIÓN

AGORA

Máquina autoservicio de Correos
Máquina autoservicio de Correos Correos

La previsión ye instalar 70 dispositivos n'oficines de toa España

22 jul 2021 . Actualizado a las 05:00 h.

Correos ta instalando «máquines autoserviciu» pal depósitu de paquetes n'oficines de toa España. La previsión ye instalar 70 dispositivos n'oficines de tol país, de los que, anguaño, 43 yá tán dafechu operativos. Dos d'estos dispositivos tán previstos p'Asturies: ún na Oficina Principal d'Uviéu, asitiada n'Alonso Quintanilla; y l'otru na Oficina Principal de Xixón, na plaza Seis d'Agostu.

Esti sistema permite que los veceros depositen y paguen los sos unvios de paquetes de manera cenciella. Los dispositivos consten, en realidá, de dos elementos: un «quioscu» que dexa pesar el paquete na so balanza, calcular el preciu correspondiente al pesu, escoyer el tipu d'unviu según el plazu deseáu, realizar el pagu y xenerar la etiqueta identificativa del unviu; y un «DropBox» o buzón que s'abre pa depositar el paquete, previa llectura del códigu del unviu.

Siguiendo la información indicada na pantalla del dispositivu, el veceru puede realizar la operación por sí mesmu, d'una forma «bien cenciella», según la empresa. Lo primero ye asitiar el paquete na balanza para llograr el pesu y calcular el preciu correspondiente. Dempués escuéyese'l tipu d'unviu preferíu en función de la so necesidá y les opciones disponibles. De siguío, grabense los datos del remitente y destinatariu, amás de la dirección de facturación si se desea, y procédese al pagu per aciu de tarxeta bancaria. La máquina espide una etiqueta identificativa del unviu con tolos datos necesarios, que va haber que pegar nuna zona visible del paquete.

Finalmente, va haber que pasar esi códigu pel llector del buzón, abrilu pa depositar el paquete y zarralu pa que se complete la entrega. La operativa ta disponible en dellos idiomes y, si'l veceru quier, puede dexar rexistraos los sos datos pa entainar el procesu nos unvios siguientes.