Cada ciudadanu refuga cada añu ente 20 y 30 quilos de testil
28 jul 2021 . Actualizado a las 05:00 h.La Fundación Humana recuperó 562 tonelaes de testil usao nel Principáu nel primer semestre d'esti añu pa da-yos una segunda vida al traviés de la reutilización o'l recicláu, frente a les 469 tonelaes recoyíes nel mesmu periodu del añu pasáu, lo que representa una xuba del 19%.
Les 562 tonelaes equivalen a 2,5 millones de prendes que la so xestión implica un beneficiu ambiental, al amenorgar la xeneración de residuos y evitar la emisión de 1.781 tonelaes de CO2 a l'atmósfera y xenera un empléu indefiníu por cada 30.000 quilos de testil recoyío. Amás, trés millones de persones viéronse arreyaes nos programes de desenvolvimientu nos países del Sur con proyectos centraos na formación de profesores de primaria, l'impulsu de l'agricultura sostenible o la llucha contra'l Sida, ente otres acciones.
El responsable del área de Recoyida d'Humana n'Asturies, Ricardo Rodríguez, asegura que les prendes que se recuperen son un activu que se convierte en motor d'empléu y xenerador de fondos pa la cooperación al desenvolvimientu nel hemisferiu Sur, lo mesmo que de sofitu llocal y agricultura urbana y social nel nuestru país.
Cada ciudadanu refuga cada añu ente 20 y 30 quilos de testil y, según los datos apurríos pola entidá, n'Asturies xenérense ente 20.000 y 30.000 tonelaes de residuos testiles añalmente, pero namás se recupera selectivamente una décima parte de lo que se xenera nel llar pa promover la so reutilización o recicláu. El 50% de la ropa puede reutilizase y más del 35% puede reciclase, pero Humana alvierte de la importancia de depositar la ropa usao nel contenedor apropiáu, yá que cuasi'l 90% de los residuos testiles nun acaben nel puntu de recoyida afayadizu.