Más d'un cientu de piloñeses participen na iniciativa de l'asociación La Benéfica pa recrear les «wunderkammer» en cuatro llocales zarraos
30 jul 2021 . Actualizado a las 11:20 h.Más de 300 obres de 125 autores distintos formen parte de los cuatro gabinetes de maravíes qu'integren la esposición cola que l'asociación cultural La Benéfica pretende revitalizar los escaparates de dalgunos de los establecimientos zarraos de L'Infiestu. En mayu, esta asociación que tien a Rodrigo Cueves al frente, llanzaba una convocatoria abierta a toles persones de la contorna de Piloña pa que presentaren les sos creaciones artístiques y, hasta xunu, recibiéronse trabayos de tou tipu de disciplines como pintura, dibuxu, fotografía, cómic, cerámica, cestería, artesanía o testiles.
Con toles pieces montáronse cuatro gabinetes de maravíes asitiaos en cuatro tiendes de la cai Cuadonga que van poder ser visitaos hasta'l próximu 15 d'ochobre. La inauguración va tener llugar el próximu miércoles 3 d'agostu a les 12 de la mañana.
Según espliquen dende l'asociación, les wunderkammer (gabinetes de maravíes o intereses) tuvieron en boga ente les clases aristocrátiques a partir del sieglu XVI y yeren cuartos nos que los nobles de la dómina recoyíen y entemecíen tou tipu d'oxetos exóticos ya intereses.
«Los gabinetes de maravíes que s'esbillen a lo llargo de la cai Cuadonga de L'Infiestu tán formaos poles obres que toos aquellos piloñeses fueron xenerando cola so creatividá, la so paciencia, la so llaboriosidá o la so fantasía. Gústanos la idea de comunidá, del montón harmónicu, y por ello esibimos toos xuntos les nuestres maravíes, ensin distinción, clases nin categoríes, nuna especie d'hermandá amalgamada polo xeográfico, xuníos polos llugares comunes de les nuestres hestories», espliquen dende l'asociación, na que remarquen que s'usaron los escaparates de delles tiendes qu'antaño esibieron mercancíes y que, col tiempu, fueron zarrando, vaciándose y «afarando na so escayencia al conceyu enteru». Con esta iniciativa, pasen de ser polvorientos llugares ensin usu a «fascinantes» gabinetes de maravíes coles que volver da-yos vida cultural.