Les proyecciones van celebrase los vienres d'agostu en cuatro centros de la Rede Natural d'Asturies y l'accesu va ser llibre y gratuitu, hasta completar aforu
02 ago 2021 . Actualizado a las 20:53 h.La Dirección Xeneral del Mediu Natural, en collaboración cola Fundación Oso Asturias, pon en marcha un ciclu de cine de branu pa concenciar a la población llocal y a los visitantes sobre la importancia de caltener la biodiversidá. L'actividá tamién va dexar dinamizar el territoriu dende'l puntu de vista cultural y social.
Los centros d'interpretación de la Rede Natural d'Asturies (RENA) del Parque Natural de Redes (Casu), de la Reserva Natural Parcial de la Ría de Villaviciosa, la Casa del Osu (Proaza) y el de Courias (Cangas) van acoyer una proyección cada vienres d'agostu.
L'accesu va ser llibre y gratuitu hasta completar un aforu llendáu poles midíes de prevención énte la covid-19. Les películes escoyíes pa esti ciclu: Cantábrico, Dehesa, Guadalquivir y Nómadas del viento, van dir rotando pelos cuatro centros. De siguío, ufiértase una curtia sinopsis de caúna d'elles.
Cantábrico
Un cordal espectacular de más de 400 kilómetros llevántase como una gran barrera paralela a la costa del mar que lleva'l so nome, el Cantábricu. Na so otra aguada, preséntase apinada de cañones y montes continentales de fayes, carbayos y castañales. Ye'l territoriu del osu pardu cantábricu, que se convierte en filu conductor de la película.
Nómadas del viento
El llargumetraxe céntrase nes aves migratories y les sos travesíes de miles de quilómetros, semaes de peligros a los que tienen d'enfrentase pa sobrevivir.
Guadalquivir
El ríu Guadalquivir ye'l calce que xune trés de los espacios naturales más importantes d'España: Cazorla, Sierra Morena y Doñana. La película amuesa la vida al pasu de la corriente y los paisaxes d'estes tres árees, onde habiten l'águila real, el venáu y la cabra montés, en distintes dómines del añu.
Dehesa
Un monte únicu nel mundu con encines, sufreres y caxigales ye'l llar de grandes herbívoros y la redolada onde cacen llobos cervales ibéricos y águiles. Tamién ye un llugar que recibe cada añu a miles de viaxeros de llarga distancia que busquen un clima más templáu y un alimentu singular: les abiyotes.