Acabóse la XXXII edición de los Xuegos Olímpicos modernos celebraos en Tokio, la ciudá más habitada del mundu. Anque entamaron el 23 de xunetu d'esti 2021, en realidá son los Xuegos de 2020, yá que nun pudieron celebrase l’añu pasáu por cuenta l’andancia. El Comité Olímpicu Internacional (COI) concedió la celebración del acontecimientu al país asiáticu a pesar de qu’en 1964 yá se celebrare esta cita tamién en Tokio. Y estos xuegos vinieron apicalbaos de curiosidaes. Dende que’l publicu foi sustituyío por robots con forma de l'antorcha olímpica, inspirada na figura de sakura, o flor de zrezal, una flor delicada bien envalorada polos xaponeses, por nun falar de les medayes ecolóxiques, diseñaes pol artista nipón Junichi Kawanishi y feches a partir del reciclaxe de teléfonos móviles vieyos o pequeños aparatos electrónicos. Ensin duldes, representen una idea con un impactu ecolóxico y ambiental bien positivu.
España zarró los Xuegos Olímpicos con 17 medayes, tres oros, ocho plates y seis bronces. Una collecha igual que la de Ríu de Janeiro 2016, anque con menos oros. El casu ye que comparase colos demás ye una escelente manera de sentinos «menos felices». Y dígolo non por Italia, que nos dobló en medayes, sinón porque n'estudios con medallistes olímpicos, los que ganaron la medaya de bronce víense verdaderamente más felices col so tercer llugar que los que ganaron la de plata; espero que los nuestros nun se sientan culpables por nun ganar la medaya d'oru y que vivan la increyible experiencia de ganar una medaya, anque nun seya l’ansiada dorada.
Pero’l discutiniu tamién tuvo presente nos Xuegos gracies a les mal llamaes cames anti-sexu que, a lo que paecía, limiten las relaciones sexuales a los atletes polo que, amás de dar muncho que falar, convirtiéronse en célebres dafechu. Ello ye que tradicionalmente esti tipu d’eventos dan pie a aventures romántiques ente los deportistes. Sábese d’un montón de pareyes ente atletes que se conocieron nunos Xuegos, sobremanera na villa olímpica. La organización tizó esti discutiniu cuando apurrió un manual pa tolos deportistes nel que s'aprofiaba qu'al entrar na Villa Olímpica teníen qu'evitar alcuentros cercanos con otres persones: «Caltener al mínimu les interacciones físiques colos demás». Si dicíen qu’evitaren «el contactu físicu, incluyíos los abrazos y los apretones de manos», entendíase que’l sexu tampoco diba ser mui bien recibíu. Asina que se dixo qu'estes cames feches de cartón namái soportaben el pesu d'una persona, pero non, la realidá nun ye esa. Les cames aguanten hasta 200 kilos, diseñáronse muncho primero de que llegare la pandemia del COVID-19 y el so reciclaxe va salvar la vida d’una montonera d’árboles adultos y aforrar casi 8 millones de llitros d'agua. De toles formes si nun queríen contactu físicu, por qué repartieron condones. Ye verdá que’l comité organizador de los Xuegos Olímpicos solicitó más de 150.000 condones que se-yos entregaron a los atletes, pero l’oxetivu yera concienciar sobre les enfermedaes de tresmisión sexual como'l VIH, que, según el director xeneral de la Villa Olímpica, Takashi Kitajima, «son una amenaza pa la mocedá en munchos países». Amás, el repartu nun foi novedá, los condones vienen apurriédonse a los atletes olímpicos dende los Xuegos Olímpicos de 1988 en Corea del Sur. Y l’atleta Jessica Fox ta mui pero que mui agradecida por esti repartu, pero nun penséis mal: gracies a los condones l'atleta australiana convirtióse na primer campeona olímpica de la categoría C1 de piragüismu eslalon de Tokio 2020. Esto nun foi un bulu, llogrólo depués d'iguar el so kayak con un condón. Yo nun sabía que los preservativos tamién podíen usase pa iguar canoes, pero como son elásticos y bien fuertes valen tanto pa un rotu como pa un descosíu.
Más estrictos y pexigueros entá que los organizadores de los Xuegos fueron los socorristes de Ribeseya. Coincidiendo colos Xuegos Olímpicos llanzaron un mensaxe insólitu: «El serviciu de salvamentu informa que ta prohibío bañase en porrica». Una probe pareya espatuxó y echó a correr hacia les sos toalles, porque nun teníen a mano ni tan siquiera les cames de cartón. Nun sé si a partir d’agora esti tipu d’avisos van sentise más que los referentes al arenal y a la so seguridá o a prohibiciones de bañu por mala mar. Y, tamién en Ribeseya, la periodista asturiana, Menchu Álvarez del Valle, la güela de la reina Leticia ?vinculada al incipiente procesu de recuperación del asturianu nos años sesenta, locutó dellos discos onde se recitaben poemes en llingua asturiana?, enantes de morrer el 27 de xunetu fizo unes declaraciones que dexaron impactao a mucha xente y nun me refiero a les polítiques, que podrían paecer mui desatinaes, sinon a les palabres referíes a la so muerte: «Quiero un funeral con gaiteru y allegría», «Voi dir y nun sé cuándo. Sí sé que nun quiero un funeral con cura melindrosu porque soi capaz de llevantame y dicir: ¡Abúrrome. Calla, coño, déxame colar a gustu!» Pues eso, be happy hasta cuando vayas morrer, que va ser meyor.
Y falando de Xapón y de les sos curiosidaes hai dalgo que me presta compartir. Ello ye que’l primer domingu d'abril de cada añu marca la celebración d'un festival sintoísta de la fertilidá, conocíu como Kanamara Matsuri, nomáu Día Mundial del Pene. El so orixe ta en Xapón (concretamente na ciudá de Komaki), onde esta celebración síntoísta venera la fertilidá. Les casi enllénense de decoraciones y tou tipu d'oxetos en forma de pene para celebrar Kanamara Matsui (nome orixinal d'esta festividá). L'atracción principal ye una figura de 2 metros y mediu d'altu, tallada en madera, que se tresllada dende la pagoda masculina hasta la femenina. El Kanamara Matsuri de Kawasaki, una celebración relixosa sintoísta, ye pa los europeos unu de los festivales de primavera más célebres, anque un tanto estravagante y porcaz. Hai una lleenda que diz qu’un espíritu malinu namoróse d’una virxe y nun quería compartila con naide. Pero la moza llogró casase dos vegaes y nes dos el demoniu capó a los homes a mordigaños. La muyer, desesperada, mandó a un ferreru facer un pene d'aceru sobre'l que'l demoniu rompió los dientes, lo que-y valió pa llevar una vida sexual normal. Y falando de vida sexual normal, tolos 8 d’abril, dende va 13 años vien celebrándose el Día Internacional del Orgasmu Femenín, una celebración que nun nació en Xapón sinón nun pueblín brasileñu llamáu Esperantina. Un conceyal, depués de lleer un estudiu realizáu pola Universidá Federal de Piauí nel que dicía qu'el 28% de les muyeres d'esa rexón yeren incapaces de llegar al orgasmu, concluyó qu’había una problemática grave de salú pública que yera necesario remediar, y non solo en Brasil, porque la situación yera asemeyada al resto del mundu. Sorpreses que da la vida, o a lo meyor nun son tantes sorpreses. ¡Vete tu a saber! Como dicía Woody Allen «l’amor ye la respuesta, pero mientres esperes la respuesta, el sexu plantega dalgunes entrugues abondo interesantes».