El fútbol asturianu de los años 20 y 30, retratáu por Constantino Suárez

S. F. REDACCION

AGORA

El Muséu del Pueblu d'Asturies recibe una donación de 200 imáxenes del fotógrafu xixonés que tamién revelen el so interés pola fotografía artística

16 ago 2021 . Actualizado a las 11:13 h.

El Muséu del Pueblu d'Asturies recibió la donación de 200 fotografíes de Constantino Suárez (Xixón 1899- 1983), toes elles orixinales positivaes pol mesmu fotógrafu, que se sumen al archivu que se caltien dende 1992 nel equipamientu cultural. Esta donación, realizada pol empresariu xixonés Vicente Fernández, da a conocer una faceta nueva de Suárez: el so interés pola fotografía puramente artística y el so dominiu de les técniques pictoralistes.

De les 200 fotografíes, 176 vienen en trés álbumes con un formatu de 18x24 centímetros y otres 24 son de gran formatu a partir de negativos fechaos ente 1920 y 1933. Dos de los álbumes contienen semeyes d'equipos de fútbol asturianu, sobre manera de Xixón, y de partíos, realizaes ente 1920 y 1935. Ente otros, apaecen equipos como Hispania de El Llano, Somió F. C., Atlético de El Llano, Viesques F. C., Cimadevilla F. C., El Cantábrico F. C., Club Gijón, Sporting, Racing de Sama, Stadium de Oviedo, Avilés, Español de Barcelona o les selecciones asturiana y la de Méxicu.

El mesmu Suárez anotó al aviesu de les fotografíes deportives los nomes de los xugadores de les distintes formaciones y de los campos onde entós apostábense los partíos, como El Molinón, La Campona, La Electra o Viesques, según el resultáu del alcuentru.

Un tercer álbum contien fotografíes feches por Suárez dempués de la Guerra Civil en Xixón y en conceyos del oriente d'Asturies, nes qu'apaecen imáxenes de mercaos, semeyes de persones y animales, escenes de llabradores o barrios de Xixón.

Los 24 positivos de gran formatu tienen una voluntá artística dafechu y amuesen panorámiques de Cangas de Narcea, arquitectures monumentales d'Avilés, paisaxes rurales, escenes de la Vuelta Ciclista a Asturies y, sobre manera, vistes urbanes de Xixón y del ambiente del so puertu pesqueru.

Imáxenes inédites

Según espliquen nel muséu, Suárez desvélase nestes obres como un discípulu aventayáu del Atenéu Obreru de Xixón y de la so preferente atención a la fotografía artística dende les esposiciones qu'entamen en 1922 hasta'l llabor del so Grupu d'Escursionismu y Fotografía constituyíu en 1923. El fotógrafu pon en práctica les técniques propies d'una fotografía mayor», d'una espresión artística autónoma que s'avera al grabáu al traviés de la goma bicromatao, el cianotipu y otres variantes con escelentes resultaos que roblen el so dominiu técnicu y la so capacidá pa una espresión amplia tanto na fotografía artística como na documental pura, aquélla que lu definió como un singular reporteru gráficu.

El valor de les fotografíes d'esta donación mora en dellos aspeutos, inciden dende'l muséu, en que se trata de positivos realizaos pol mesmu fotógrafu antes y dempués de la Guerra Civil, en parte documentaos pola so propia mano, con imaxenes desconocíes dafechu y qu'amuesen esa faceta desconocida d'un Suárez interesáu pola técnica pictorialista, «qu'apodera con cierta maestría».

Les 200 fotografíes fueron nel so momentu apurríes por una de les herederes de Suárez a una familia xixonés y adquirióla Vicente Fernández pa donales al muséu.