L'ALLA defende la referencia xeográfica «alloñada d'otres valoraciones que podríen interferir dando puxu a sensibilidades más encontaes nes cuestiones emocionales»
17 ago 2021 . Actualizado a las 05:00 h.Los nomes son importantes y dalgunos de los alderiques más complicaos nel pasáu y nel presente fueron pola forma na que se denoma daqué. Tamién les mesmes llingües. L'alderique sobre l'usu d'eonaviegu llegó a la Xunta Xeneral de la mano del diputáu de Podemos, Rafael Palacios, quien entrugó a la Conseyería de Cultura pola so preferencia por esta denomación frente a la de gallego-asturianu.
Na so respuesta, la conseyería destaca que «nos últimos tiempos obsérvase un usu cada vez mayor del términu eonaviegu per parte de persones y colectivos, ente ellos l’Academia de la Llingua Asturiana que fala, por exemplu, de la ellaboración del Diccionariu Eonaviegu nel que trabaya».
La conseyería consultó de forma previa a l'ALLA quien apostó en primer llugar pola denomación más usada coloquialmente na que se cita fala enonaviega pero, amás, destaca la consideración de «reforzar llegalmente el términu que vien usándose estos años con daqué éxitu en círculos más reducíos pero con resultaos aceptables. Referímonos al términu eonaviego o llingua eonaviega que tien la gran virtú de facer usu d’una referencia como ye la xeográfica, alloñada d’otres valoraciones que podríen interferir dando puxu a sensibilidaes más encontaes nes cuestiones emocionales».
La conseyera Berta Piñan señala na so respuesta que'l Gobiernu autonómicu «entiende que l’Academia de la Llingua Asturiana ye la institución que pue dar pautes meyor que nadie pa fixar el nome de la llingua del occidente d’Asturies, un nome sobre’l que construyir el necesariu consensu social y políticu que permita una meyor promoción y el fomentu del usu de manera más eficaz».
Amás cita los resultaos de la III Encuesta Sociolingüistica del Navia-Eo, de Francisco Llera Ramo, con fecha de xunu del 2021 y según el so avance «el 65,5% de los habitantes respuende que la denomación de la fala del Navia Eo ye fala eonaviega».