Una ruta guiada pel camín percorríu va cinco sieglos y visites teatralizaes a la Casa de los Hevia son les propuestes de la fin de selmana
18 ago 2021 . Actualizado a las 05:00 h.Baxo'l títulu Memoria del Desembarco, los actos conmemorativos del Desembarcu de Carlos V, Fiesta d'Interés Turísticu del Principáu d'Asturies, ufierten anguaño una ruta guiada pel Camín Real Carlos V Tazones-Villaviciosa y visites teatralizaes a la Casa de los Hevia, llugar onde pasó la nueche l'entós Príncipe de Gante a la so llegada a España en 1517.
La ruta guiada, de 11 quilómetros de percorríu y que va salir a les 10 hores de los díes 20, 21 y 22 d'agostu, parte del puertu de Tazones hasta Villaviciosa y, según espliquen dende'l conceyu, ye toa una oportunidá p'adientrase y contemplar la ría de Villaviciosa, les aldees de Lliñeru, Samartín del Mar, Bedriñana o la cascada de Llames, amás d'ilesies romániques xunto a texos centenarios. «Nel mesmu camín que fai más de cinco sieglos percorrieren aquellos navegantes desembarcaos por azar na nuestra tierra, vamos buscar cosadielles, remedios melecinales y lleendes singulares que güei conformen un increíble paisaxe natural y humanu», espliquen. Ye indispensable reserva previa de plaza (gratuita) nel teléfonu 626361783, onde informen de los detalles de l'actividá.
Les visites teatralizaes a la Casa de los Hevia van tener llugar les tardes del 21 y 22 d'agostu, con trés pases a les 17, 18 y 19 hores y en grupos de 15 persones. Cuerren a cargu del grupu Teatro Contraste, que propón una pequeña representación que recuerda la llegada y estancia en Villaviciosa del príncipe Carlos y el so séquitu en 1517, na mesma casa, güei restaurada, onde s'agospió, según los históricos acontecimientos qu'ellí se vivieron. Cola so llegada dende Flandes pa tomar posesión de los reinos peninsulares, el Príncipe Carlos entraba en contactu cola tierra de los sos ancestros hispánicos, dando asina entamu al so primer gran viaxe d'Estáu. Les entraes pa los pases, gratuites, van poder recoyese, dende'l miércoles 18 d'agostu, na Oficina de Turismu de Villaviciosa, allugada na mesma Casa de los Hevia.
Dende'l Conceyu tamién recuerden el so apueste por una cultura segura, siendo obligatoriu l'usu de mázcaru n'interior y tando encamentáu en tolos casos al ser obligatoriu tamién n'esteriores si nun se caltien la distancia de seguridá interpersonal, al igual que la hixene de manes nel accesu a los recintos. Énte los cambeos que pudieren producise pola mor del covid-19, tamién s'encamienta comprobar con frecuencia en www.culturavillaviciosa.es que tolos eventos siguen programaos y nun fueron modificaos, pospuestos o cancelaos.