El Rally Blendio Princesa d'Asturies desvela los sos tramos

G.G. REDACCIÓN

AGORA

Mapa de tramos del Rally Princesa de Asturias
Mapa de tramos del Rally Princesa de Asturias Rally Princesa de Asturias

La organización pon en marcha un rexistru d'aficionaos pa cumplir los protocolos de seguridá sanitaria

19 ago 2021 . Actualizado a las 05:00 h.

La organización del Rally Blendio Princesa d'Asturies fizo públicu'l Road Book y el percorríu d'esta edición, polo que yá se conocen los tramos exactos nos que van competir los participantes de la prueba deportiva. Trátase de distintos trazaos de los conceyos d'Uviéu, La Ribera, Llanera, Xixón, Morcín, Nava, Noreña, Sariegu, Samartín del Rei Aurelio y Mieres.

El trazáu diseñáu va favorecer la competencia y va ufiertar grandes dosis d'emoción a los aficionaos. Los equipos, coles mesmes, van tener ocasión d'amosar el so nivel nes carreteres asturianes alzando la categoría d'una prueba que yá s'atopa ente les más destacaes del mundu del motor.

La ceremonia de salida va tener llugar na tarde del xueves na Plaza de la Catedral d'Uviéu y a partir d'esi momentu va empezar una competición de la  que la so programación puede consultase na páxina web del rally.

Rexistru obligatoriu pal públicu

Y pa cumplir colos protocolos de prevención del COVID-19 púnxose en marcha un rexistru obligatoriu pa toes aquelles persones que quieran dir como públicu. Tolos asistentes al eventu deportivu tienen de tar rexistraos pa cumplir asina cola normativa sanitaria. El trámite a realizar faise na páxina web que vien darréu.

En cubriendo'l formulariu apurriráse un códigu QR que los aficionaos tienen de llevar siempres nel so móvil pa poder dir a la competición. Dende la dirección de la prueba rueguen a los asistentes que sigan esta pauta y alviértese-yos qu'esti códigu va poder ser riquíu en cualquier momentu y llugar del rally. Nun presentalu va ser motivu d'espulsión por cuenta de la necesidá de priorizar la seguridá y amenorgar al mínimu'l riesgu d'andanciu. Pa ello solicítase tamién l'usu de mázcaru, el llaváu recurrente de manos, l'usu de xel hidroalcohólico  y el mantenimientu de la distancia social.