Ventiocho mozos de Francia, Alemaña, Italia y España realizaron un mosaicu xunto a les piscines municipales
19 ago 2021 . Actualizado a las 20:21 h.El conceyu de Cangas del Narcea acoyó esti branu un intercambiu xuvenil de la ONG Amicitia, nel que participaron ventiocho mozos ente 15 y 26 años, que tuvieron na villa canguesa ente'l 26 de xunetu y el 5 d'agostu. Una iniciativa que'l so oxetivu ye concenciar sobre la importancia y la necesidá de caltener los recursos naturales.
Nel proyectu participaron mozos de Francia, Alemaña, Italia y España que busquen crear conciencia pa que los participantes y tolos cangueses adquieran una mayor consideranza sobre'l mediu ambiente y los sos problemes concretos. Por esti motivu, los mozos ellaboraron xunto a les piscines municipales y cerca del ríu Luiña un mural que representa una fola del mar.
El mosaicu foi realizáu con cerámica que los mozos fueron asitiando pa concenciar sobre la necesidá de caltener llimpios los nuesos océanos. Una espresión artística que, amás de sensibilizar sobre'l mediu ambiente y los sos problemes, va sirvir como decoración nesta zona de la villa.
El proyectu desenvolvióse cumpliendo los protocolos Covid-19, trabayando en grupos reducíos y siendo obligatorio una PCR negativa de los participantes, quien nun caltuvieron contactu social mientres los primeros díes de la so estancia y a los que se-yos tomaba la temperatura diariamente. Los participantes tamién pudieron esfrutar de visites culturales, xuegos ya intercambios de cultures, dando a conocer caún d'ellos los sos países d'orixe al restu de participantes.