La telellectura de los contadores del agua llega a la zona rural de Siero

G. G. REDACCION

AGORA

Pilar Canicoba

Van instalase 599 p'anovar el 5% del parque municipal que nun tien esti sistema

21 ago 2021 . Actualizado a las 18:08 h.

El Conceyu de Siero axudicó la implantación del sistema de telellectura de contadores na zona rural del conceyu. La meyora del serviciu, que va empezar a implantase ente los últimos meses d'esti añu y principios del próximu, va ser posible gracies a la instalación de 599 contadores con tecnoloxía WalkBy, lo que supón anovar el 4,98% del parque de contadores municipal que nun cunten col actual sistema de telellectura. 

Asina lo esplicaron esti vienres l'alcalde de Siero, Ángel García González, y el conceyal de Facienda; Xestión Económica y Presupuestaria; Organización; y Réxime Interior, Alberto Pajares San Miguel, acompañaos pol xerente d'Agües, Vidal Gago Pérez.

Los nuevos contadores manden una señal que recueye un receptor instaláu nun vehículu que va pasar a midir cada dos meses. Esti dispositivu va encargase de tresmitir la información a una aplicación Android al traviés de Bluetooth, onde se decodifiquen los datos de llectura y alarmes inclusive ensin conexón a internet. 

L'alcalde de Siero destacó qu’esto evita a los vecinos tener que tar na vivienda nel momentu de la llectura y puede aplicase a cualquier contador independientemente de que tenga mal accesu. 

Pajares San Miguel añadió que va realizales con mayor frecuencia, optimizando asina la toma de datos de contadores d'agua. En cuanto al espliegue d'esta nueva ferramienta, el conceyal adelantró que se va facer en llocalidaes de les parroquies d’Anes, El Cuto, Marcenao y Muñó. 

L'ampliación del contratu de tellelectura pa la instalación de los contadores nuevos na zona rural supón una inversión de 47.111,35 euros y ta recoyida nos cambeos de creitu y de cambéu de la plantiya pal usu del remanente líquidu de tesorería.