La protección de la Ilesia de La Collá va xunida al árbol que la acompaña
25 ago 2021 . Actualizado a las 05:00 h.Hai casos nos que la degradación del patrimoniu ye tanta que les actuaciones apenes pueden llegar a tratar d'evitar que la ruina vaya a más. Ye'l casu de la ilesia de San Pedro de La Collá, en Siero, con un elementu singular que la fai tovía más especial, xunto al edificiu qu'hai que protexer tien que guardase tamién un árbol, un texu.
La situación de la ilesia en La Collá llegó al parllamentu de la mano del diputáu de Podemos Asturies Rafael Palacios que cuestionó a la conseyería polos sos planes respecto al templu y al árbol.
Na so respuesta, la conseyería señala que mesmo la ilesia como'l texu tán protexíos baxo una declaración de Bien d'Interés Cultural aprobada en 2017 pero yá nesi momentu'l so estáu arrastraba munchos problemes «nel momentu de la so declaración la ilesia de San Pedro de La Collá presentaba un estáu de ruina, frutu d'una quema sufrida na Guerra Civil. L'oxetivu de la declaración BIC ye caltener el templu siquier neses condiciones garantizando que la ruina se consolide y nun vaya a más, poniendo en peligru la mesma esistencia del templu».
Según informa'l mesmu conceyu de Siero esta Ilesia foi catalogada por dellos espertos como de dómina románica anque tanto les sos dependencies principales como la so estructura, el so gran ábside con forma cuadrangular, por casu, pueden englobase dientro de les ilesies rurales de los sieglos XVI y XVII, anque la espadaña ye d'orixe Barrocu.
¿Y l'árbol? Según diz la Conseyería inclúise al Texu nel BIC pa «garantizar que cualquier actuación que se desenvuelva na redolada va tener d'evaluar el potencial impactu sobre l'árbol, col envís d'evitar daños sobre'l mesmu».
El texu, árbol totémicu d'Asturies, ye un exemplar de 438 cm de cuerda y con un altor d'unos 15 metros, llegando dalgún de los sos raigaños hasta l'interior de la ilesia en ruines.