Asturies, Cantabria y Aragón creen la «Unión Nacional de Equino Hispano Bretón»

G.G. REDACCIÓN

AGORA

Firma de la creación de la Unión Nacional de Equino Hispano Bretón
Firma de la creación de la Unión Nacional de Equino Hispano Bretón Acgema

L'oxetivu ye trabayar nel desenvolvimientu d'esta raza y promover proyectos de desenvolvimientu rural sostenible

28 ago 2021 . Actualizado a las 05:00 h.

Asturies, Cantabria y Aragón constituyeron la «Unión Nacional de Asociaciones de Equino Hispano Bretón» pa trabayar nel desenvolvimientu d'esta raza y promover proyectos de desenvolvimientu rural sostenible centraos o venceyaos col caltenimientu de la ganadería estensiva.

La firma pa constituyir esta federación nueva, qu'axunta a más de 7.000 exemplares y un millar de socios, producióse nel conceyu cántabru de Ruente, onde va tener el so llar nel Palaciu de Mier. La unión va tar integrada pola «Asociación de Criadores de Ganado Equino de Raza Hispano Bretona de Cantabria» (MENAES), l'«Asociación de Criadores de Ganado Equino de Raza Hispano Bretona de Asturias» (ACGEMA) y l'«Asociación Aragonesa de Criadores de Equino Hispano Bretón» (ARAHISBRE).

La presidencia va correr al cargu de Cantabria na figura de la máxima responsable de MENAES, Carmen Ramasco, según informó'l Gobiernu rexonal cántabru. Tres la firma, el conseyeru de Desenvolvimientu Rural, Ganadería, Pesca, Alimentación y Mediu Ambiente de Cantabria, Guillermo Blanco, destacó'l «pasu de xigante» que supón la constitución d'esta federación pa impulsar el desenvolvimientu de la raza hispano-bretona.

El conseyeru tamién recordó qu'esti caballu forma parte del patrimoniu cultural, con un censu abondosu en Cantabria, onde «desempeña un papel imprescindible» nel mediu rural como elementu tractor de la ganadería y pal caltenimientu de la rica biodiversidá de los sos ecosistemes.