«Asturies, Cultura en Rede» salta a 20 conceyos en septiembre

La Voz

AGORA

El programa inclúi esti mes un total de 26 propuestes que formen parte de los circuitos temáticos d'artes escéniques, artes visuales, música, cultura tradicional, Xacobéu 2021 y Autores nel Camín

31 ago 2021 . Actualizado a las 13:27 h.

Les actividaes del programa 'Asturies, Cultura en Rede' de la Conseyería de Cultura, Política Llingüística y Turismu lleguen en setiembre a 20 conceyos asturianos.

Esta propuesta, que se fai en collaboración colos conceyos asturianos y la xestiona la Sociedá Pública de Xestión Turística y Cultural del Principáu d'Asturies, inclúi esti mes un total de 26 propuestes que formen parte de los circuitos temáticos d'artes escéniques, artes visuales, música, cultura tradicional, Xacobéu 2021 y Autores nel Camín.

Rock & roll, swing, pop o canción llírica son los xéneros que vamos poder disfrutar de la mano del circuitu de música, que programa seis conciertos pal mes de setiembre: Pipo Prendes presenta Asturianos en Noreña; l'Antología Lírica de Asturias d'Emilio Menéndez va sonar en Corvera; Fe de Ratas va celebrar el 25º aniversario en Llangréu; Luis Núñez va tocar los temes del so proyectu Blinca en Sanmartín del Rei Aurelio; y Sariego va acoyer el conciertu Deslices de Jorge Colsa y Gema Bravo y la xira de presentación de Body & The Soulers.

Les lletres asturianes percuerren distintos puntos de la xeografía de la rexón gracies a los circuitos de lliteratura y Autores Nel Camín que programen un total de 12 actividaes. La llectura dramatizada Fierro, carbón y metralla de Hoja de Lata Editorial en Llanes; sesión d'animación llectora pa bebés ¡Al circo! de Tras la Puerta Títeres n'El Franco; Cuentos del Jabón de Pompas y Pompones en Ribeseya; l'acción músico-llectora Soy palabra, soy una canción de Musa Cafeína en Candamo; el taller Palabras como llaves, tamién de Musa Cafeína, en Les Regueres, y Cartoneras, un taller de creación colectiva de llibros con materiales reciclaos de Lara Meana, en Llanera, formen parte de la programación del circuitu de lliteratura.

Amás, el públicu va poder asistir a los alcuentros de Autores Nel Camín con Higiénico Papel Teatro en Castrillón y Carreño; col escritor y críticu lliterariu José Ángel Gayol n'Ayer; col novelista Sidoro Villa en L.lena; con María José Fraga, una de les autores más prolífiques en gallego-asturiano, en Castropol, y col cantante Xune Elipe en Villaviciosa.

La soprano asturiana Tina Gutiérrez y la cantante gallega Lucía Pérez -que representó a España en Eurovisión-, unen les voces pa enseñar les canciones más representatives del repertoriu tradicional gallego y asturianu en Asturias y Galicia: unión de dos culturas, que va llegar de la mano del circuitu Xacobéu 2021 a Corvera. Los espectáculos Diestro y Siniestro por el Camino de Higiénico Papel Teatro en Villaviciosa y Concha, Bordón y Calabaza, pícaros y peregrinos d'El Callejón del Gato en Sotu'l Barcu completen la programación del circuitu Xacobéu pa setiembre.

La Triloxía poética: Al horru d'Ediciones Pata Negra va llegar a Pravia de la mano del circuitu d'artes plástiques y visuales. Esti homenaxe a esti elementu tan representativu y peculiar de l'arquitectura mueble d'Asturies y d'España va poder vese nel Auditoriu José Barrera ente'l 18 de setiembre y el 17 d'octubre.

El circuitu d'artes escéniques lleva en setiembre a Llanes l'espectáculu de narración oral Cuando Mayo Marcea de Ana Morán Teatro y a Mieres l'espectáculu La mona Simona de La Sonrisa del Lagarto mientres que les propuestes del circuitu de cultura tradicional apuesten pola música de Tradicionando de Fabriok - Fábrica de ocio y producción en Pravia y la narración oral de Carlos Alba Cellero y l'espectáculu Dos oreyes y una boca que va poder vese en Llaviana.