La modalidá deportiva va presentase de manera oficial y federada en Bimenes
02 sep 2021 . Actualizado a las 05:00 h.El llugar ye Bimenes y la fecha ye'l 5 de setiembre. Ellí la llucha tradicional asturiana, el valtu, va dar el pasu pa ser presentada énte'l públicu xeneral baxo l'amparu de la Federación Asturiana de llucha.
Nel Polideportivu de Bimenes va tener llugar una exhibición a partir del meudía y amás ente los actos inclúyese, dende les 10.00 hores, una homologación de valtu como monitor rexonal a la que pueden optar técnicos federaos. El día d'Asturies, el 8 de setiembre, los actos van treslladase a Xixón.
Pero ¿qué ye'l valtu? Los oríxenes de la llucha autóctona asturiana pueden rastrexase bien atrás nel tiempu, inclusive a la dómina previa a la conquista de Roma. De fechu según recueye la Wikipedia asturiana, l'historiador griegu Estrabón cita «son mañosos n'emboscaes, áxiles, llistos,...Practiquen lluches ximnástiques, hoplítiques y hípiques. Exercitándose pal puxilatu, la carrera, les safadures y les batalles campales... asina viven estos montañeses que como dixi son los qu'habiten nel llau septentrional d'Iberia, esto ye, los kallakoi, Astoures y kantabroi.. ».
De forma más recién, nel sieglu XVIII ye Xovellanos quien fala de «el deporte de la Llucha nunca nun faltaba nes romeríes del so tiempu y país».
Nel valtu, diz la Wikipedia: dos lluchadores gárrense pasando'l brazu derechu pel hombru izquierdu del contrariu y la mano izquierda per baxo'l sobacu derechu, xuniendo dambes esquites nel llombu d'ésti. Los lluchadores queden d'esta miente trabaos y tenten entós, per aciu de la fuercia colos brazos y de mañes, de valtar al contrariu en suelu. Les normes son firmes y controlen l'agresividá de los lluchadores en tou momentu.
L'Ayuntamientu de Bimenes informó que «l’oxetivu final ye convertir el valtu nuna modalidá federativa con llicencia propia y que se la reconoza na Federación Española de Llucha asina como nel Conseyu Superior de Deportes» y que el cursu d’homologación va entamase’l próximu domingu, 5 de setiembre, a les 10:00 hores, nel Polideportivu Manuel Arboleya de Santuyano / San Julián (Bimenes) onde, darréu, a les 12:00 hores, va facese un amuesa de presentación d’esta disciplina.