El saniamientu de la marxe izquierda ente Bedriñana y Samartín del Mar cuenta con un presupuestu de 11 millones
08 sep 2021 . Actualizado a las 10:34 h.La Confederación Hidrográfica del Cantábricu (CHC) abrió un plazu de 20 díes hábiles d'información pública pa conocer el proyectu d'incorporación al saniamientu de Villaviciosa de la marxe izquierda de la ría, ente Bedriñana y Samartín del Mar, que cuenta con un presupuestu de casi 11,8 millones d'euros.
La rede de saniamientu va dar serviciu a les zones de Bedriñana, Samartín, El Requexu y Oles, qu'anguaño carecen d'esti sistema, incorporando les sos agües residuales a la rede qu'escurre pela marxe izquierda de la ría de Villaviciosa.
Tolos vertíos van ser trataos na estación depuradora d'agües residuales de Rodiles, previo a la so evacuación al mar Cantábricu al traviés d'emisariu somarín.
Ta prevista la construcción d'una rede d'unos 18,5 kilómetros de colectores de 315 milímetros de diámetru que van escurrir por gravedá y pa salvar la orografía va ser necesaria la execución de 9 estaciones de bombéu que van impulsar les agües residuales al traviés de 3,2 kilómetros de tubería con diámetros comprendíos ente 50 y 63 milímetros.
Per otru llau, por cuenta de la incorporación de los nuevos caudales a la rede qu'escurre pela marxe izquierda de la ría de Villaviciosa, proyéctase, amás, l'ampliación de la capacidá de los bombeos d'Albatros, Tazones y Rodiles anguaño esistentes.
Pa la correcta execución de les obres proyectaes va ser necesaria la ocupación d'un total de 90 parceles privaes, con una superficie afectada d'alredor de 55.000 metros cuadraos.
El proyectu va tar n'información pública mientres 20 díes hábiles dende la publicación del anunciu nel Boletín Oficial del Estáu y del Principáu d'Asturies y va poder consultase nes oficines de la Confederación, nes dependencies del Conceyu de Villaviciosa y na páxina web de la CHC.