Ramón d'Andrés, sobre les llingües: «La mayoría de les conocencies son una colección d'idees precientífiques»
AGORA
El profesor de la Universidá d'Uviéu advierte de que nun se sabe estremar ente la naturaleza real de les llingües y el so aspectu normativu y, por tanto, se perpetúa los prexuicios alredor del llinguaxe
08 sep 2021 . Actualizado a las 11:33 h.El profesor de la Universidá d'Uviéu y ganador de la XXVII edición del Premiu Máximo Fuertes Acevedo d'Ensayu por Una ciencia sin enfotu. Ensayu sobre la deserción social de la llingüística científica, Ramón d'Andrés, afirmó que la mayoría de les conocencies que tien la xente común y les élites cultes sobre'l llinguaxe y les llingües «sigue siendo una colección d'idees precientífiques y utilitaries, como si'l tiempu tuviera paráu dende finales del sieglu XIX».
En declaraciones a Europa Press, esplicó qu'esta obra ye una reflexón sobre'l papel de la llingüística científica na sociedá. Trátase d'una de les ciencies más desarrollaes a lo llargo del sieglu XX, pero «la mayoría de les conocencies que tien la xente común y les élites cultes sobre'l llinguaxe y les llingües sigue siendo una colección d'idees precientífiques y utilitaries, como si'l tiempu tuviera paráu dende finales del sieglu XIX».
Idees, esplica D'Andrés, como qu'hai llingües primitives y otres modernes, qu'hai llingües aptes pa unes coses o pa otres o qu'hai palabres más guapes qu'otres. «Nun se sabe estremar ente la naturaleza real de les llingües y el so aspectu normativu que sal de les academies y de les comenencies sociales», comenta.
«Too esto conforma un pensamientu precientíficu que perpetúa los prexuicios alredor del llinguaxe y les llingües, como si la llingüística científica nun existiera de va un sieglu o sieglu y mediu», esplicó'l profesor, p'añadir que tovía güei hai llingüistes «que siguen apegaos a conceptos precientíficos y a intromisiones ideolóxiques nel exerciciu de la so ciencia».
Una situación que según el profesor de la Universidá d'Uviéu «ayuda a esparder y perpetuar socialmente auténtiques boberíes alredor del llinguaxe y les llingües, cuando la so función tendría que ser la contraria». «Amás bien de llingüistes confunden el so papel científicu cola exaltación identitaria de la llingua que falen», comentó.
Un tracamundiu que tien el so reflexu nos llibros de testu o nel pensamientu xeneral de la sociedá. «La exaltación nacionalista d'una llingua mayoritaria ye una manifestación estrema d'esto que digo, pero pel mediu hai munchos graos intermedios», indicó.
«La mayor parte de les conocencies que formen la cultura xeneral de la xente sobre'l llinguaxe y les llingües son creyencies, ideoloxíes y saber popular», esplica'l profesor, que suma a esta situación qu'hai «bien de llingüistes» que se siente a gustu con eses creyencies, ideoloxíes y saber popular nel exerciciu de la so ciencia. «El panorama supón una auténtica deserción social de la llingüística científica y una situación que ye necesario superar», sentencia, informa Europa Press.