10 propuestes pa esfrutar de los Rincones y Recovevos de la Llaboral

G. G. REDACCION

AGORA

LABORAL CIUDAD DE LA CULTURA

El festival d'artes escéniques celebra la so cuarta edición los díes 17 y 18 de setiembre

15 sep 2021 . Actualizado a las 11:22 h.

El Festival d'Artes Escéniques n'Espaciu Singular Rincones y Recovecos va celebrar el 17 y 18 de setiembre la so cuarta edición en Llaboral Ciudá de la Cultura, con un completu programa qu'inclúi 10 propuestes de teatru, poesía, humor, clown o títeres en distintos espacios del complexu de Cabueñes como'l patiu barrocu, el paraninfu, la sala de pintures, el teatru Alejandro Casona de la ESAD o la caxa escénica del teatru.

El festival va inaugurar con un alcuentru poéticu con Nacho Atienza y l'alumnáu de la ESAD, nun apueste pola creación, pol trabayu de los mozos y por establecer vínculos ente'l mundu académicu y el profesional de les artes escéniques. La tarde del vienres va siguir col espectáculu Smile de Carmela, nel que l'actriz va buscar la sorrisa nun campamentu de neños y neñes refuxaos; con Pan de Teatro Plus, una obra que fai analoxía ente'l pan y el ser humanu; y col estrenu de B-612, una coproducción asturiana-rioxana de les compañíes Realidad Traviesa y Teatro del Cuervo, que va llevar al públicu a la hestoria d'El Principín al traviés de les lluces, les solombres y los colores proyectaos nun asteroide y que tamién se va representar el sábadu. Tres en raya de Tdiferencia, la divertida hestoria de trés muyeres y cómo-yos afecta a caúna la pandemia, va zarrar la programación del vienres 17.

El sábadu 18 la imaxinación va volar con Tina y Leti de La Maleta Teatro, una función pa entender que toos somos únicos y especiales nel mundu enteru; la música, la cultura y la tradición oral africana van tar presentes n'El percusionista de Gorsy Edú, nuna hestoria qu'inclúi la emigración en busca de meyores oportunidaes; y Thana y Deva van conocer en La neña de les trences al revés d'El Callejón del Gato, anque una d'elles viva n'Asturies y la otra, en Mali. Una payasa va salir del interior d'una maleta pa consiguir, ayudada pol públicu, la so llibertá en Rojo de Mireia Miracle Company y el ramu del Festival ponlu Alberto Rodríguez cola so Vida y milagros de Berto Rodríguez, una pieza músico-teatral sobre la peripecia vital, ficcionada, del artista, dende los sos oríxenes humildes hasta'l so ésitu internacional.

Les llocalidaes tienen un preciu de 6 o de 12 euros per espectáculu y hai descuentu del Club Cultura Principáu d'Asturies pa compra antemanada. Les entraes pueden adquirise na Recepción de la Llaboral, nel Centru d'Información Turística del Principáu d'Asturies (CITPA) n'Uviéu, nel Centru Niemeyer n'Avilés y na web de la Llaboral, onde se va comunicar cualquier cambéu na programación.