Compromís reclama que l'asturianu pueda usase nel Senáu como'l restu de llingües oficiales

El plenu del Senáu aprobó reformar el reglamentu pa permitir l'usu de les llingües cooficiales na actividá de la Cámara Alta. Nesi sentíu, el senador de Compromís, Carles Mulet, reclamó ampliar esti usu a les llingües tovía non cooficiales, pero si reconocíes oficialmente, como l'asturianu

Na actualidá, les llingües cooficiales puen ser usaes nel debate de mociones y mociones consecuencia de interpelación, o nel usu d'entrugues escrites siempre que vengan acompañaes de la so traducción en castellanu. La función llexislativa o de control del Gobiernu, hasta'l momentu, tenía que facese namás en castellanu. Col cambiu aprobáu ayeri, los senadores van poder intervenir nos plenos, nes comisiones y en tola actividá parllamentaria nes llingües que tengan el calter d'oficiales en dalguna comunidá autónoma, informa Europa Press.

Mulet valoró que la manera meyor de permitir la presencia de les llingües propies d'Aragón, Asturies, Cantabria, Rexón Llionesa, Estremadura, Ceuta o Melilla sería avanzar na so oficialidá. «Nuna cámara territorial, tocaría permitir yá l'usu de toles llingües, pa cumplir asi col mandatu de la mesma Constitución», sentenció.

---

---