L'exame pa la provisión interina de funcionarios va tener llugar n'ocho aules de la Facultá de Medicina del campus d'El Cristo
24 sep 2021 . Actualizado a las 05:00 h.L'Institutu Asturianu d'Alministración Pública Adolfo Posada va realizar el próximu sábadu, día 25 de setiembre, l'exame pa la creación d'una bolsa d'empléu que tien como finalidá la provisión interina de puestos de trabayu reservaos a funcionarios d'Alministración local con habilitación de calter nacional na subescala de secretaría.
Ésti ye'l primer procesu selectivu xestionáu pol Principáu, tres l'aprobación del Real Decretu 128/2018, qu'habilita a les comunidaes pa ellaborar, nel so ámbitu territorial, llistes d'interinos pa la provisión de puestos de trabayu reservaos a funcionarios d'Alministración local con habilitación de calter nacional.
Pa esta prueba tán convocaes 545 persones, que se van repartir n'ocho aules de la Facultá de Medicina y Ciencies de la Salú del Campus d'El Cristo d'Uviéu.
Per otra parte, la próxima selmana, ente los díes 27 y 30 de setiembre, l'Adolfo Posada va efectuar les trés pruebes iniciales del primer exerciciu de la fase d'oposición del procesu selectivu pa la provisión de 21 places de bomberos conductores del Serviciu d'Emerxencies del Principáu (Sepa). Estos puestos correspuéndense coles ufiertes d'empléu públicu de los años 2018 y 2019.
Los exámenes, consistentes en llevantamientu de pesu, xubida de cuerda llisa y carrera de 3.000 metros llisos, van celebrase nel complexu deportivu de Les Mestes, en Xixón.
Los 519 aspirantes de la vez llibre convocaos tán distribuyíos en cuatro díes y en 35 grupos. Pa la execución de les pruebes adoptáronse toles midíes necesaries de protección frente a la covid-19.