Depués d'un añu de parón pol andanciu de la covid-19, llega con novedaes pa dar cabida a más públicu como cosplay, música electrónica y mensaxes a diez años vista
29 sep 2021 . Actualizado a las 18:36 h.La celebración del Día de la Reciella va volver esti sábadu al Pueblu d'Asturies, depués d'un añu de parón pol andanciu de la covid-19, y llega con novedaes pa dar cabida a más públicu, como actividaes d'introducción al cosplay, música electrónica y mensaxes a diez años vista.
Asina lo destacaron el presidente de la Fundación Municipal de Cultura (FMC), Miguel Barrero, y el responsable del eventu, David Guardado. La octava edición del festival celébrase col lema L'asturianu sal con nós.
Guardado esplicó qu'esti día suma actividaes n'asturianu dirixíes a tola familia. Eso sí, poles restricciones sanitaries, nun va haber la popular carrera, nin talleres «de contactu», nin danza prima.
Sí que va cuntar con actividaes de deporte, ociu y cultura, como cuentacuentos, folclore, mercadín, conciertos y exhibiciones deportives. La xornada va empezar con una actividá d'axedrez, siguida d'una exhibición de fútbol del Club de Fútbol del Ciares, que va narrar Pelayo Rodríguez.
Tamién va haber una exhibición de valtu -llucha asturiana- y van actuar los neños de la banda de gaites El Gumial. Coles mesmes, l'eventu va acoyer un espectáculu de música electrónica, con tintes asturianos y amiestu d'audiovisuales.
Como novedá, va desenvolvese una actividá d'introducción al cosplay, cola participación de Shiro Ychigo, una cosplayer asturiana con presencia en redes sociales.
Amás, de la mano de Cuatro Gotes, quien lo quiera va poder dexar un mensaxe al futuru, pa neños de dientro de diez años. El conteníu del mensaxe va ser llibre.
Coles mesmes, los asistentes van poder esfrutar d'un taller de baille tradicional, un mercáu de música y lliteratura n'asturianu, un cuentacuentos, y un conciertu de Kikirikikí, al cargu d'Alicia Álvarez y David Varela.
Guardado destacó que namás na organización del festival participen ente 60 y 70 persones que trabayen «desinteresadamente», como tamién los que desenvuelven les actividaes. Pa dar a conocer l'eventu, editóse un vídeu al cargu de Pablo Quiroga y Juan Tizón, informa Europa Press.