Cultura va a poner en marcha un programa d'enseñanza p'adultos d'asturianu y eonaviegu
AGORA
El plan pilotu va combinar la enseñanza presencial, la formación a distancia y l'autoformación
30 sep 2021 . Actualizado a las 13:50 h.La Conseyería de Cultura, Política Llingüística y Turismu va poner en marcha nel 2022 un programa d’enseñanza non reglada pa persones adultes n’asturianu y eonaviegu. Asina lo esplicó’l director xeneral de Política Llingüística, Antón García, na so comparecencia na Comisión de Cultura de la Xunta Xeneral, onde indicó qu’esta iniciativa va contribuyir al caltenimientu y fortalecimientu d’estes llingües «fomentando la espresión oral, la llectura y la conocencia de les normes d’escritura»
«Partiendo de la esperiencia d’asociaciones o de los Servicios de Normalización Llingüística pa diseñar una rede formativa con implantación en tol territoriu, esti programa va valir, amás, pa promocionar la nuestra cultura y reflexonar sobre’l conocimientu propiu, munches veces pasivu, de la nuestra llingua materna», indicó García.
La fase pilotu d’implantación del programa va realizase cola collaboración de los conceyos que quieran sumase, estableciendo nellos Aules de Llingua p’Adultos. Esta iniciativa va ser accesible pa tola ciudadanía, va combinar la enseñanza presencial, la formación a distancia y l’autoformación y va ayudar a la preparación de les pruebes de certificación dientro del Marcu Común Européu de Referencia pa les Llingües.
Otra manera, García esplicó les midíes impulsaes dende’l so departamentu p’ameyorar la formación permanente del profesoráu y anovar la ufierta de materiales pedagóxicos, cola mira d’adaptalos a les tecnoloxíes nueves. Nesti sentíu, recordó que, frutu del trabayu conxuntu ente la dirección xeneral y la Conseyería d’Educación, l’añu pasáu foi la primer convocatoria de pruebes de certificación, les de nivel intermediu (B2), mentes qu’anguaño van celebrase pruebes nueves pal B2 y pal nivel avanzáu (C1).
Amás, el director indicó qu’anguaño existe un primer borrador de decretu de niveles de certificación pal gallego-asturianu o eonaviegu, una convocatoria que quier llevase a cabu nel cursu escolar actual.
Per otra parte, el responsable de Política Llingüística anunció la convocatoria de dos premios nuevos pal eonaviegu: la Ría del Eo, de poesía, y el Quiastolita, de lliteratura infantil, en collaboración colos Servicios de Normalización de la zona. Xunto a ellos, van llanzase tamién dos premios nuevos pal asturianu: el Florina Alías, a la meyor traducción, y l’Enriqueta González Rubín, pa narrativa moza.
P’acabar, la conseyería va llevar a cabu dos campañes de normalización llingüística: una destinada al sector alimentariu y otra sobre la sidra y el vocabulariu rellacionáu cola bebida rexonal. Amás, va caltener la collaboración col Festival Intercélticu de Lorient (Francia), onde Asturies va ser la invitada d’honor nel 2022.