La presidenta del PP asturianu anuncia una iniciativa parllamentaria encamentando a la Xunta Xeneral a que repruebe a la ministra Teresa Ribera, «enfotada en mancar a Asturies»
30 sep 2021 . Actualizado a las 19:52 h.La presidenta del PP d'Asturies, Teresa Mallada, dixo güei que los censos oficiales reflexen un aumentu de la población llobera «y yá tamos viendo llobos en playes d'Oriente y Occidente». Nesi sentíu, anunció esti xueves que'l so grupu va presentar una iniciativa parllamentaria encamentando a la Xunta Xeneral a que repruebe a la ministra de Transición Ecolóxica, Teresa Ribera, pola so decisión d'incluyir el llobu nel Llistáu d'Especies Monteses Protexíes (Lespre). Según Mallada, trátase de «un ataque nuevu d'una ministra enfotada en mancar a Asturies».
Asina lo adelantó Mallada nuna rueda de prensa na que tuvo acompañada pola diputada nacional y portavoz d'Agricultura del PP nel Congresu, Milagros Marcos, y representantes de los sindicatos agrarios Asaja, COAG y UCA. La popular cargó contra la decisión adoptada pol Gobiernu central y criticó al presidente del Principáu, Adrián Barbón, por escaecer que son los sos compañeros de partíu los qu'impulsaron esta midida «y por aprovechar una vez más la valentía de los presidentes del PP de Galicia y Castiella y Llión pa dir tres ellos como yá fixo n'otres cuestiones como l'estatutu de la industria electrointensiva».
La presidenta del PP d'Asturies recordó que ye'l secretariu d'Estáu de Mediu Ambiente, l'asturianu Hugo Morán, el responsable d'esti «ataque a los ganaderos abanderando la iniciativa de protexer al llobu». Asina, encamentó a Barbón, como secretariu xeneral de la FSA a esixi-y que defenda les directrices de los socialistes asturianos si estos defenden con ganes a los ganaderos, informa Europa Press.