Los ventisiete

AGORA

La Junta General
La Junta General J.L.Cereijido

02 oct 2021 . Actualizado a las 23:15 h.

Esi ye'l númberu precisu de diputaos p'aprobar la reforma del Estatutu d'Autonomía que permita una oficialidá n'Asturies que mos integre nel grupu de comunidaes que protexen los sos idiomes propios nel marcu constitucional.

Ventisiete son tamién los estaos miembros de la Xunión Europea. Dende les instituciones europees consideren esta tema una cuestión qu'hai de fomentar ya iguar, empobinándola a la normalización social per aciu la so calificación d'oficial. Como'l so llema Xunida na Diversidá. De mou democráticu y pacíficu. Como se vien pidiendo dende hai cuatro décades.

Cuasi la metada de los ciudadanos españoles viven nuna autonomía onde la llingua propia ye tamién oficial. Falta la nuesa pa entrar na nueva normalidá dafechu, la sanitaria y la llegal xunto a esta. L'esfuerciu descomanáu nes cais por camudar la situación, tien agora'l vientu favoratible nel gobiernu tres más de cuarenta años de vindicación popular. Pa facer parte de los ventisiete namái fai falta daqué d'espíritu democráticu y de tolerancia social y cultural.

El pueblu asturianu aceutará con normalidá que la so identidá llingüística plural se reconoza dempués de tantes engarradielles nel ámbitu políticu. Los ventisiete pasarán a la hestoria d'Asturies por trespasar la muria de la incomunicación y la rixidez negativa con que foi tratáu esti pueblu hasta agora. Nuna democracia imperfeuta, coxa, que nun cedía a la hora d'abrir la puerta a la llibertá d'escoyeta de los ciudadanos nel usu oral o escrito en tou llugar, de les llingües que conviven nel territoriu astur.

Aportó la hora. Ventisiete ciudadanos col so votu aprobarán una llei que mos faiga iguales al restu de ciudadanos del Estáu. Nesi sen, espérase que la manifestación del 16 d''ochobre de 2021 seya la cabera d'una llarga riestra de movilizaciones necesaries pal algame d'esti oxetivu. Nel intre, xuégase la llibertá, la igualdá y la fraternidá (como dicen na república vecina) ente nós y con tolos pueblos que conformen España.

Finarán les marxinaciones, censures y prohibiciones de toa mena y entamará una nueva dómina que faiga pol respetu de los drechos llingüísticos de tolos habitantes d'esti pequeñu país verde del norte peninsular. Que ye'l de nueso. El de toos y toes. Cuando la oficialidá seya declarada na Xunta Xeneral asitiada n'Uviéu.