La Fundación Oso de Asturias (FOA) entama un alcuentru que va axuntar a técnicos y especialistes de comunidaes autónomes d'España y distintos países
06 oct 2021 . Actualizado a las 05:00 h.La Fundación Oso de Asturias (FOA) entama, en collaboración cola entidá griega «Arcturos», que tien una bultable y esitosa trayectoria na materia, y col sofitu de la Fundación Biodiversidad del Ministeriu pa la Transición Ecolóxica y el Retu Demográficu, el Seminariu Internacional «Rehabilitación de osos pardos: Estudio de casos y desarrollo de protocolos de trabajo. Hacia una red europea de colaboración».
L'alcuentru va desenvolvese na Casa del Osu de Proaza ente'l 6 y el 8 d'ochobre y van participar nel mesmu técnicos y especialistes que trabayen en distintos aspectos del comportamientu d'animales y manexu de carnívoros cautivos y que provienen, amás d'Asturies, de Castiella y Lleón, Galicia, Cantabria, Cataluña, lo mesmo que de Francia, Grecia, Rumania y EEXX.
El seminariu tien como oxetivu l'intercambiu d'información y la ellaboración de criterios y protocolos comunes sobre los procedimientos a siguir énte l'apaición d'osos con problemes, dende la so detección hasta la so reintroducción nel mediu natural. Amás, nes xornaes va presentase la propuesta de la Fundación Oso de Asturias y d'Arcturos de crear una rede de collaboración Europea, «CAREBEAR», cola participación de técnicos y especialistes na rehabilitación d'osos de les alministraciones, ONGs y entidaes científiques.
La idea ye qu'esta rede de collaboración facilite la comunicación directa ente los sos miembros, permita intercambiar documentación con unos mínimos estándares d'información, disponga de procedimientos de consulta rápidos y s'actualice dacuando coles últimes meyores na materia. Ente otres actividaes, los espertos van compartir casos de rehabilitación d'osos n'Estaos Xuníos, Grecia, Rumanía, Francia y España, nos que van conocer detalles como les instalaciones emplegaes, los procedimientos de trabayu o les circunstancies especiales de cada osu. El programa completase con talleres prácticos p'aldericar los meyores protocolos en cada circunstancia y facilita que los técnicos compartan idees p'ameyorar dichos protocolos.
El comité organizador ta formáu por José Tuñón y Noa González (FOA), Alexandros Karamanlidis, Melina Avgerinou y Miguel de Gabriel (Arcturos), Javier Naves (Estación Biolóxica de Doñana-CSIC) y John Beecham, de la Unión Internacional pal Caltenimientu de la Naturaleza (IUCN).