La XDLA presenta'l cantar y el videoclip de «Llegó la hora-Chegóu el hora» p'animar la marcha del sábadu
13 oct 2021 . Actualizado a las 19:45 h.El portavoz de la Xunta pola Defensa de la Llingua Asturiana (XDLA), Carlos Pulgar, esperó que la manifestación pola oficialidá d'esti sábadu «sía la última» y la sociedá asturiana «pueda pasar páxina» a una "falta de derechos" y «abrir una etapa nueva».
Pulgar presentó, xunto al músicu Xune Elipe, esti miércoles n'Uviéu la manifestación d'esti 16 d'ochobre pola oficialidá del asturianu y del gallego-asturianu, amás d'un videoclip d'apoyu a la convocatoria.
La marcha va salir a les 12.00 hores de la Estación del Norte y va acabar na Plaza de la Catedral. Ellí, l'actriz María Cotiello y el presentador del tiempu de TPA David Arango van encargase de lleer el manifiestu final, mentes que'l DJ Fruela 757 y el cantante Rodrigo Cuevas van encargase de poner el ramu a la xornada reivindicativa con un miniconciertu. Na convocatoria tamién van participar gaiteros y pandereteres p'animar la marcha.
Pel momentu, la manifestación yá cuenta col apoyu de tolos sindicatos mayoritarios, amás d'una parte importante de los partíos políticos y del texíu asociativo asturiano, indicaron dende la XDLA.
Amás, la organización destacó que xente conocío de la sociedá asturiana -como Silvia Quesada, Lisardo Lombardía, Sonia Figalgo o los grupos Skama la Rede o Felpeyu, ente otros- ta mostrando'l so apoyu y animando a la participación na convocatoria al traviés d'una campaña en redes. Amás, los personaxes del programa infantil 'Animalada Xabaz' de TPA tamién protagonizaron un videu p'animar a la participación na marcha del 16 d'ochobre.
Pulgar indicó que la XDLA lleva faciendo manifestaciones dende 1987, pero recordó que la oficialidá ye namás un preséu «pa que l'asturianu y el gallego-asturianu sigan existiendo dientro de 50 o 300 años», p'añadir qu'esperen qu'esti sía la última manifestación pa «que l'Asturies democrática pueda pasar páxina a una falta de derechos y abrir una etapa nueva».
La manifestación, según indicaron, busca que la sociedá civil tresmita a los representantes políticos na Xunta Xeneral la necesidá de recoyer nel Estatutu la oficialidá de la llingua asturiana y el gallego-asturianu. «Tamos convencíos que va a haber esa oportunidá», señaló.
Nesi sentíu, Xune Elipe recordó que «lo primero y urxente ye si tamos a favor de que los asturianos tengan derechos y nun haiga discriminaciones». «Depués los partios van llevar a la practica esi reconocimientu de la oficialidá y desarrollar el derechu de que tolos asturianos somos iguales», afirmó.
«Llegó la hora / Chegóu el hora»
P'animar a la participación, la XDLA publicó esti miércoles el cantar y el videoclip de 'Llegó la hora-Chegóu el hora'. Trátase d'un cantar n'asturianu y gallego-asturianu que ye una idea orixinal de Xune Elipe con composición musical de Maxi Compán, con producción musical y técnicu de soníu de Sergio Díaz.
La lletra ye de Francisco Álvarez con versión en gallego-asturianu de Xosé M. Suárez. El tema ta interpretáu por 'músicos pola oficialidá 2021', que nesta ocasión ta formáu por Maxi Compán (voz y guitarres), Isra Sánchez (batería), Luis Melero (baxu), Sergio Díaz (baxu y guitarres), Rubén Bada (guitarra), Javi Tejedor (gaita, acordión, tambor y pandereta), Xune Elipe (voz), Lluci Palomares (voz), Pablo Martínez (voz), Silvia Quesada (voz), Leticia Baselgas (voz y pandereta), y Shalom (voz rapiao).
Elipe esplicó que'l tema, al traviés de la voz de dellos músicos de toles escenes y toles procedencies, que canten n'asturianu, castellanu o inglés, porque busca «representar a la sociedá asturiana». «Ye un cantar qu'apella al sentimientu y que tien humanidá, emotivu y que tien fuercia».
El videoclip ye obra del realizador Pablo Quiroga y, amás de los cantantes, sal xente anónimu sonriendo. «Nesta reivindicación nun sobra naide y frente los discursos de odiu y el color negru y gris de la xente que se manifiesta dende les sos cavernes nós ponemos el coloríu y el nuestru corazon pa la defensa de les nuestres llingües. Nós, a diferencia d'otros que s'escuenden baxu l'anonimatu damos la cara allegremente con nomes y apellíos», sentenció'l líder del grupu Dixebra; informó Europa Press.