La Executiva de la FSA va participar na manifestación pola oficialidá d'esti sábadu

La Voz OVIEDO

AGORA

La pancarta que encabeza la Marcha por la Oficialidá de 2018 en Oviedo
La pancarta que encabeza la Marcha por la Oficialidá de 2018 en Oviedo

La representación socialista na marcha va tar encabezada pola secretaria de Educación, Universidades y Normalización Llingüística, María Luz Pontón Álvarez

14 oct 2021 . Actualizado a las 14:05 h.

La Executiva de la FSA-PSOE va tar representada na manifestación pola oficialidá del asturianu y del gallego-asturianu qu'entama la Xunta pola Defensa de la Llingua Asturiana esti sábadu 16 d'ochobre n'Uviéu.

Según indicaron fontes del partíu a Europa Press, la representación socialista na marcha va tar encabezada pola secretaria de Educación, Universidades y Normalización Llingüística, María Luz Pontón Álvarez. Amás, va haber más representantes de la FSA, anque todavía tán por concretar, porque una parte importante de la dirección del partíu va tar esi mesmu fin de selmana en Valencia nel 40 Congresu Federal del PSOE. A estos hai que sumar l'apoyu del secretariu xeneral del SOMA, José Luis Alperi -sindicatu fuertemente vinculáu a la historia del socialismu asturianu- qu'apoyó la marcha nes redes sociales y n'artículos en prensa.

La FSA nes manifestaciones

Históricos dirixentes del socialismu asturianu, como Vicente Álvarez Areces o Amelia Valcárcel participaron en 1976 na manifestación qu'entamó «Conceyu Bable» pa reclamar l'autonomía política y la introducción del asturianu nel sistema educativu. Foi la primer manifestación que s'autorizó na rexón depués de la muerte de Francisco Franco.

Anque les Mocedaes Socialistes participaron delles veces más nes manifestaciones pola oficialidá, sobre too nes entamaes en metá de los debates políticos sobre la reforma del Estatutu d'Autonomía, la primer vez que'l PSOE tuvo representáu oficialmente nuna marcha a favor d'esti marcu llegal pal asturianu y el gallego-asturianu foi nel 2017, depués de que la militancia de los socialistes asturianos alcordara nel 32 Congresu de la FSA, el 1 d'ochobre del 2017, respaldar esti marcu llegal pa la llingua asturiana.

La secretaria d'organización Gimena Llamedo encabezó la representación socialista nuna marcha que, según la organización, cuntó con 30.000 persones y a la que tamién acudieron otros socialistes como Enrique Fernández -conseyeru d'Industria actual-, María Luz Pontón, Fernando Prendes, Miguel Barrero, Vanesa Fernández, Begoña Menéndez, José Luis Alperi y Roberto García Morís.

Con too, a finales de los años noventa, en metá del procesu de reforma del Estatutu, destacaos dirixentes del PSOE asturianu, como Antonio Trevín, José Luis Iglesias Riopedre o Graciano Torre llegaron a cuestionar la posición del so partíu, históricamente contrariu a la oficialidá, y llegaron a participar a títulu individual en dalguna manifestación, informa Europa Press.

Agora, con otru procesu de reforma del Estatutu abiertu y onde, pela primer vez, les fuercies favorables a la oficialidá puen sumar los votos necesarios, la FSA vuelve cuntar con una representación oficial nuna manifestación que la Xunta pola Defensa de la Llingua Asturiana espera que «sía la última» pa que la sociedá asturiana «pueda pasar páxina» y «abrir una etapa nueva», indicaron dende la organización.