La Comisión de Cultura del Congresu aprueba una PNL pa que l'asturianu opte a ayudes estatales

La Voz

AGORA

Sofía Castañón
Sofía Castañón

La iniciativa recueye la posibilidá d'acceder a subvenciones pa la traducción pa les llingües ensin reconocer como oficiales, pero sí como 'propies'

19 oct 2021 . Actualizado a las 18:45 h.

La Comisión de Cultura y Deporte del Congresu aprobó esti martes una Proposición Non de Llei (PNL) pa que l'asturianu y l'aragonés puedan optar a les ayudes y premios estatales destinaos a obres lliteraries nes distintes llingües del Estáu.

La iniciativa --que recueye la posibilidá d'acceder a subvenciones pa la traducción pa les llingües ensin reconocer como oficiales, pero sí como 'propies'-- cuntó col apoyu de PSOE, Unidas Podemos y el Grupu Plural, mentes que Vox votó en contra y el PP y Ciudadanos astuviéronse.

La encargada de defender la PNL foi la diputada asturiana d'Unidas Podemos, Sofía Castañón, que recordó que n'España, amás de les oficiales, hai otres llingües que son propies «y según la Constitución y la Carta Europea de les Llingües ye llabor de les instituciones protexeles». Asina, señaló que «depués de 40 años esperando pola oficialidá, estes llingües propies deben de gociar d'una protección especial».

Per otru llau, dende'l PSOE, Guillermo Antonio Meijón, indicó qu'anque les llingües minoritaries son competencia de les comunidaes autónomes, «eso nun tien qu'implicar un abandonu del Estáu, que tien que tomar parte proactiva en defensa d'esti patrimoniu cultural». «Les llingües non oficiales formen parte d'esi patrimoniu y tienen que ser protexíes, como marca la Constitución», destacó.

La diputada de Junts Pilar Calvo Gómez tomó la palabra en nome del Grupu Plural pa destacar que, amás del so votu positivu a la iniciativa, otra forma de defender la Carta europea de les llingües minoritaries y la mesma Constitución «ye fomentar la protección d'estes llingües na llei del audiovisual futura». «Ye'l futuru de cara a los nuestros mozos», esplicó.

Dende Vox, el diputáu Joaquín Roble López, descalificó la PNL porque «nun tien sentíu» la traducción a les llingües minoritaries «cuando s'entiende perfectamente n'español». Asina, llegó a calificar a la llingua asturiana de «un llinguaxe nuevu creáu artificialmente» como «estratexa de Podemos y los separatistes pa consiguir dineru» y «resquebrar la unidá nacional»; informó Europa Press.

P'acabar, el 'popular' Juan Luis Pedreño Molina indicó que la PNL céntrase n'aspectos que son de competencia autonómica, como la reconocencia de les "distintes categoríes llingüístiques" nos sos estatutos. "La diversidá llingüística n'España ye una riqueza qu'hai que caltener y compartimos el compromisu recoyíu na Carta europea de les llingües", indicó, p'añadir que nun-yos paez mal la protección de les llingües minoritaries --refugó l'usu del términu de 'llingües propies'--, pero "nun pue haber ambigüedá y intromisión nes competencies de les distintes autonomíes".