El presidente insiste en que «nun se-y va obligar a falar o saber asturianu a los nuestros médicos»
22 oct 2021 . Actualizado a las 18:51 h.El xefe del Executivu asturianu'l socialista Adrián Barbón preguntáu pola propuesta del ex presidente del Principáu, Juan Ruiz Rodríguez-Vigil Rubio, sobre la posibilidá de celebrar un referéndum sobre la oficialidá del asturianu y el gallego-asturianu, indicó que «nun tien sitiu xurídicamente».
«Dígolo col mayor de los ciños y almiración que siento pol presidente Rodríguez-Vigil. Un matiz namás, cuando'l diz que nun se pue aprobar por un votu, nun ye asina, p'aprobase la oficialidá, depués yá va venir tol desarrollu, nun ye por un votu, hai que ganar por 27 votos a 18, non por un votu», indicó Barbón.
Insistió en que «ye posible una oficialidá amable y va ser obligatoria namás na protección de los derechos de los asturfalantes, pero nun se-y va obligar a falar o saber asturianu a los nuestros médicos».
«Esa nun va ser la oficialidá que yo voi defender como presidente de los asturianos», insistió Adrián Barbón, qu'énte les entrugues repetíes dixo que se trata de protexer los derechos de los asturfalantes y de da-y al asturianu'l valir abondo que permita la pervivencia de «la llingua de los nuestros güelos y güeles».
Asina insistió en que'l modelu d'oficialidá va decidise na Xunta Xeneral d'alcuerdu a los pactos colos partíos y añadió que ta convencíu de qu'anque'l PP vote en contra de declaralo oficial cuando haya que negociar el so desarrollu y modelu'l PP va tar negociando.
Añadió qu'hai otra cuestión que pasa desapercibida y ye que les comunidaes autónomes que tienen llingua oficial reciben dineru del Estáu. Barbón facía estes declaraciones nel Hotel de La Conquista d'Uviéu, na xornada na que s'entregan los Premios Princesa d'Asturies; informó Europa Press.