Les formaciones valoren positivamente que Foru s'abriera a votar una reforma que recueya la oficialidá
27 oct 2021 . Actualizado a las 14:09 h.Podemos Asturies y IX valoraron positivamente que Foru Asturies s'abriera a votar a favor d'un Estatutu d'Autonomía que recueya la oficialidá del asturianu y del gallego-asturianu, polo que'l testu sumaría los 27 votos necesarios pa la so aprobación na Xunta Xeneral.
Con too, difieren d'Adrián Pumares sobre les condiciones pal sí y reclamaron nun entemecer el debate de la reforma del Estatutu col de los presupuestos autonómicos, porque ye ehí onde, recordaron, van tener que tratase les reformes fiscales que reclamen.
Na segunda sesión del Debate d'Orientación Política, el portavoz de Foru, Adrián Pumares, anunció'l so votu favorable a la oficialidá si s'asegura la voluntariedá y que la Llei de Normalización s'apruebe por trés quintos de la Xunta Xeneral. Amás, reclamó una Llei d'Impulsu Demográficu, ayudes directes a la natalidá y desaniciar 'de facto' l'impuestu de sucesiones, bonificándolo hasta'l límite d'un millón d'euros, amás d'una reforma del IRPF.
A entrugues de los medios nuna rueda de prensa conxunta celebrada n'Uviéu esti miércoles, el diputáu de Podemos Asturies Rafael Palacios y la portavoz parllamentaria d'IX, Ángela Vallina, posicionáronse sobre la propuesta de Foru.
Nesi sentíu, Palacios destacó que'l «fechu fundamental» ye que yá hai 27 diputaos a favor de la oficialidá y destacó la necesidá de que l'Estatutu s'apruebe «lo más ceo posible» n'Asturies, pa que llegue a Congresu y salga alantre ellí nesta llexislatura. Amás, valoró qu'Adrián Pumares punxo «en marcha otra vez el procesu» depués de selmanes de «paralís».
Sobre les condicionantes de Foru, Palacios esperó que tean «abiertos a discutir». «Perriba de tou ponemos el consensu y l'alcuerdu, ver lo que compartimos y ver en qué coses nos sentimos toos cómodos p'aprobar la reforma del Estatutu».
Con too, llamó a estremar ente la negociación pa una reforma estatutaria y la de los presupuestos autonómicos. «Nun podemos confundinos, pidimos seriedá», indicó, pa recordar que «falar del modelu d'oficialidá o de la Llei de Normalización nun tien sentíu» porque «lo primero ye recoyer el derechu y depués va haber que debatir sobre como implementalo».
Per otru llau, Ángela Vallina quixo más esperar a recibir la propuesta concreta de Foru Asturies, pero insistió en que «nun paez mui de recibu envolver la reforma nuna axenda económica de la derecha». «La propuesta del impuestu de sucesiones nun tien sentíu porque nun va nel Estatutu», indicó.
«La oficialidá ye una cosa y el restu de la negociación otra, que se debata cauna nel foru que correspuenda», afirmó. Amás, mostró como una incongruencia que Foru reclame al empar baxar impuestos y establecer subvenciones nueves a la natalidá; informó Europa Press.