El partíu lideráu por Santiago Abascal critica gallardones a «persones suxetes a ideoloxíes radicales»
28 oct 2021 . Actualizado a las 09:19 h.Vox cree que los premios Princesa d'Asturies puen deteriorase «gravemente» si inclúin ente los sos gallardonaos a «persones suxetes a ideoloxíes radicales», como consideren que pasó na última edición cola concesión d'ún de los sos premios a l'activista Gloria Steinem.
«El prestixu de los Premios Princesa d'Asturies pue deteriorase gravemente si se sigue primando la ideoloxía frente al méritu», alertó Vox nun comentariu publicáu na so cuenta de Twitter.
El partíu lideráu por Santiago Abascal fixo referencia a la gallardonada col Premiu Princesa d'Asturies de Comunicación y Humanidaes 2021, integrante del movimientu feminista estaounidense dende finales de los años 60.
Ente los parabienes recibíos, Steinem caltuvo un alcuentru cola ministra d'Igualdá, Irene Montero, que la definió como «la encarnación de que tolo que fixo'l feminismu día a día merez la pena».
Sicasí, pa Vox trátase d'una persona «suxeta a ideoloxíes radicales», que «estremen y enfrenten». Y denuncia'l «esmolecedor enfotu de dalgunos, que davezu son enemigos declaraos de la monarquía, por identificar a la Corona colo más agresivo de l'axenda progre».
Nel so discursu nel Teatru Campoamor d'Uviéu, Steinem dixo que los roles de xéneru son «bien nuevos na historia de la humanidá» y aplaudió cómo'l confinamientu lliberara a les persones de les sos «atadures».