El secretariu xeneral de la ONU, António Guterres, debía tar mui fartu de les vaguedaes de dellos políticos sobre’l cambéu climáticu y de qu’a pocos díes del entamu de la 26ª conferencia de les Naciones Xuníes de 2021 que ta celebrándose hasta’l 12 de payares en Glasgow dalgunos políticos declinaren asistir, como’l presidente chinu, cuando precisamente China ye xunto a Estaos Xuníos unu de los países más contaminadores, asina que nun quiso andar con paños calientes: «Basta de tratar a la naturaleza como un retrete y de cavar la nuestra propia tumba». Guterres ta convencíu de que «l’optimismu del clima ye una ilusión», y de que si siguen asina les coses vamos «encaminaos hacia una catástrofe climática». Recordó que «hai un déficit de credibilidá y munchu tracamundiu sobre los oxetivos de cero emisiones y los países tán faciéndolo con distintes métriques». Son demasiaos los que pretenden dexar la reducción de los gases d’efectu invernaderu mui lloñe del 2050 p’alantre, colo que ye imposible llograr los oxetivos marcaos; ye dicir, nun superar la temperatura global del planeta en 1’5 graos. Per otru llau, Laurence Tubiana, la promotora del acuerdu de París, alvierte que «la Cumbre de Glasgow nun va ser un ésitu como París». De toles formes, reconoz que nestos seis años los políticos tampoco «tuvieron a l’altura de los sos compromisos», polo qu’encamienta a los líderes facer el so trabayu como lo ficieron los científicos.
El casu ye que la concentración na atmósfera de los gases d’efectu ivernaderu nun dexó d’aumentar magar los distintos trataos y pa enriba en 2020 volvió a marcase otru récord. Esto supunxo daños que van ser irreversibles mientres sieglos o milenios y lleva a aumentar la intensidá y la frecuencia de los fenómenos meteorolóxicos estremos. Nun choca que viendo esti panorma la xoven ecoloxista Greta Thunberg camiente que los políticos tán traicionando a les xeneraciones d’agora y a les futures porque namás repiten un bla, bla, bla y más nada. L’activista critica les polítiques «sobre el papel» qu’anuncien gobiernos como’l del Reinu Xuníu y Estaos Xuníos, onde la realidá nun se correspuende colos discursos.
Na encuesta del Eurobarómetru del 2020 el 90% de la población española yera la más esmolecida pol cambéu climáticu. Nun estudiu recién ellaboráu por 40dB pal diariu El País, namás el 6,4% de los españoles son negacionistes. Ello ye que les persones que menos duldes tienen sobre esti tema son los votantes de Xuníes Podemos (98,6%), pero esiste poca diferencia coles persones más escéutiques; ente los votantes de Vox, por exemplu, un 83,1% cree qu’esiste, colo que malpenes los separten 15,5 puntos. La población más preocupada pol clima ye la mocedá de 18 a 24 años, un 94,3%, anque una mayoría na población de más de 65 años, el 87,3%, tamién lo ta. Con toa seguranza esta percepción ta influenciada polos fenómenos metereorolóxicos estremos que n’España tamos padeciendo nos últimos años. De toles maneres, anque los datos de la encuesta son esperanzadores, hai resistencies y contradicciones. La mayoría de la población asumió’l problema, pero malpenes el 50% cree que la so conducta cotidiana valga pa frenar el cambéu climáticu. Los europeos tamién tán mui concienciaos. Según l’Eurobarómetru d’esti añu, 9 de cada 10 europeos encuestaos considérenlu un problema grave.
Son munchos los informes sobre’l clima que pinten un panorama catrastróficu. L’últimu, del Observatoriu de la Sostenibilidá, alvierte que va haber más furacanes, un aumentu del nivel del mar, inundaciones catastrófiques o sequíes xabaces que van amenazar la producción d’alimentos. Los espertos dicen que vamos ver l’impactu nel sitiu onde vivamos. Una nueva investigación científica publicada na revista Nature Communications y que llevaron a cabu los analistes de Climate Central, diz que la xubida del nivel del agua del mar de resultes de la emisión a l’atmósfera de gases podría afectar nes próximes tres décades a zones costeres onde viven 300 millones d’habitantes en tol mundu; nun podemos escaecer que’l nivel del mar xubió 3,5 centímetros namás en 23 años. La peor parte va llevala’l sudeste asiáticu, nes ciudaes costeres, como Shanghai o Bangkok. Los estragos n’España van afeutar espacios protexíos como Doñana. El casu ye que llamentablemente n’Asturies la xubida del nivel del mar tamién va ser peor de lo que se previere hasta agora: el cambéu climátivu va camudar dafechu conceyos como Xixón y, tres Xixón, una de les ciudaes con mayor superficie afectada, tamién Avilés, en dambos márxenes de la ría, pero de manera intensa na zona industrial. Tamién destaca los desastres que provocaría en Villaviciosa, onde’l mar abriría camín al traviés de la so ría, y nos arenales como les sableres de Lluanco, anque l’impactu va vese en munches zones costeres: San Antolín, Torimbia, El Borizu, Andrín, La Isla, Bañugues… polo que se cuerre’l peligru de que se pierdan les sableres más populares del occidente y del oriente asturianu.
¿Llograremos facer les paces cola naturaleza depués de saber los terribles efectos que va provocar el cambéu climáticu? El tiempu dirá, anquen precisamente lo que nun tenemos ye muncho. ¿Alzará la voz la ciudadanía de tol mundu pa esixir a los políticos menos bla, bla, bla y más actuaciones? Ver veremos, anque ye claro que si nun se tomen yá midíes contundentes la situación va, ensin remediu, hacia un desastre ecolóxicu de proporciones inimaxinables.