Enrique López diz que nun pon nenguna llinia colorada pero recuerda que pue «dexala en papel moyáu»
17 nov 2021 . Actualizado a las 15:26 h.Podemos Asturies nun pon nenguna llinia colorada nin va bloquiar l'aprobación de la oficialidá del asturianu cola mayoría súper reforciada de trés quintos del Parllamentu que propón Foro. Sicasí, el Conseyu Ciudadanu de la formación morada decidió encargar un informe xurídicu esternu qu'esclarie les duldes sobre'l tema y abrir un periodu de reflexón pa que los partíos, sobremanera Foro, reconsideren esta cuestión.
Asina lo esplicó esti miércoles en rueda de prensa'l portavoz de Podemos Asturies, Enrique López, qu'insistió en que dende la so formación nun se pon «nenguna llinia colorada», pero si consideren que «esa mayoría súper reforciada pue poner en peligru nun futuru la pervivencia y l'aplicación d'esa oficialidá y dexala en papel moyáu».
Nesti sentíu, indicó qu'esa mayoría súper reforciada, esos trés quintos qu'esixe Foro, namás son esixentes pa una reforma d'una llei orgánica o pa la designación de los órganos que controlen la xestión del Executivu, como son la Sindicatura y el Tribunal de Cuentes.
«La mayoría absoluta paeceríanos más afayadiza pa esta cuestión. Tenemos duldes xurídiques sobre esta mayoría súper reforciada, asina qu'encarguemos un informe xurídicu esternu porque consideramos qu'abre riesgu de futuru porque una minoría podría bloquiar cualquier acción y dexar en papel moyáu esa oficialidá. Pidimos, especialmente a Foro, abrir un periodu de reflexón d'unos díes pa considerar qu'esa mayoría reforciada sía una mayoría absoluta porque creemos que pue ser meyor pal futuru de la llingua», indicó López.
Enrique López recordó que namás lleven nueve díes de negociación, polo qu'hai tiempu tovía pa poder consensuar cual ye la mayoría reforciada que se precisa.
Sobre les propuestes de Foro referentes a la fiscalidá, el portavoz de Podemos aseguró que «tán abiertos a negocialo too», anque hai cuestiones como la que tien que ver col impuestu de sucesiones onde «les diferencies son bien grandes».
«Hai diferencies bultables, pero tenemos que tar al altor de les circunstancies con una negociación que tien que ser rápida. En rebaxar de Sucesiones tenemos diferencies pero ye posible qu'haya qu'adaptar dalguna cuestión y nun tenemos nenguna llinia colorada porque somos conscientes de que ye una negociación a cuatro. Nun tenemos llinies coloraes porque somos conscientes de que tamos énte un momentu históricu», insistió.
Per otru llau, en referencia a los presupuestos del añu próximu incidió en que Podemos Asturies yá tien mui avanzada una propuesta presupuestaria pa treslladar al Gobiernu; informó Europa Press.