Antón García: «Faime gracia que digan que'l gallegu ye una llingua, pero l'asturianu non, cuando hai 150 años tábemos nel mesmu sitiu»

La Voz

AGORA

Antón García, director xeneral de Política Llingüística
Antón García, director xeneral de Política Llingüística

El director xeneral de Política Llingüística diz que la Constitución «ta pensada pa les comunidaes con llingua oficial»

03 feb 2022 . Actualizado a las 17:17 h.

El director xeneral de Política Llingüística del Gobiernu asturianu, Antón García, afirmó esti xueves que la llexislación estatal sobre les llingües propies de cada comunidá autónoma ta pensada pa que l'asturianu «sía llingua oficial».

Asina lo afirmó nuna conferencia na Universidá d'Uviéu sobre la llingua asturiana nel que tamién participaron el xurista y académicu Nicolás Bartolomé Pérez; y la ex conseyera de Cultura con Sergio Marqués, María Victoria Rodríguez Escudero.

García definió la situación actual de la llingua como'l «momentu nel que na sociedá asturiana hai un debate más vivu que nunca sobre'l so futuru». Una llingua, recordó, con 1.000 años d'historia y con una «suerte diversa«».

Asina, esplicó que na Edá Media esti idioma yera la llingua oficial del Reinu o que nel sieglu XIX la lliteratura asturiana «taba al altor del restu de lliteratures penínsulares. Faime gracia qu'agora, nesti debate, digan que'l gallegu ye una llingua, pero l'asturianu non, cuando hai 150 años tábemos nel mesmu sitiu», dixo.

García afirmó qu'a lo llargo del sieglu XX, el restu de llingües del Estáu foron «solucionando los sos problemes y creando'l so sitiu nel contestu español». Sicasí, nel casu del asturianu, esti idioma nun s'incorporó a esi procesu hasta los años setenta col Surdimientu y Conceyu Bable, cuando naz la reivindicación llingüística moderna.

Con too, situó'l pasu alantre pal asturianu cola aprobación del Estatutu y del so artículu cuatro, que reconoz pela primer vez nun documentu llexislativu «la realidá llingüística d'Asturies».

El director xeneral indicó que nel ámbitu políticu, foi nesi momentu cuando l'espectru conservador d'Asturies «retiróse de la reivindicación y dexó nes manes de la esquierda'l desarrollu políticu de la llingua». Con una escepción, recordó, l'aprobación de la Llei d'Usu, que s'aprobó por unanimidá na Xunta Xeneral.

Una llei que según García valió como guía de les polítiques llingüístiques de los Executivos autonómicos «y que ye la que guía de los pasos que da d'esti gobiernu, porque nun se fai nada que nun tea baxo l'ámparu d'esta llei».

Con too, recordó qu'esti marcu llegal, y polo tanto la falta d'oficialidá, sitúa a Asturies nun casu singular nel contestu español, porque la Constitución española y el so desarrollu «ta pensada pa les comunidaes con llingua oficial y llevamos cuarenta años abriéndonos paso a dures penes».

«Vamos montando nestos cuarenta años un procesu d'escolarización, revisamos la toponimia, vamos faciendo munches coses, pero siempre tenemos que pelear contra la llexislación básica que ta pensanda pa que l'asturianu sía llingua oficial», afirmó.

Asina, recordó que la lliteratura n'asturianu nun pue optar a les subvenciones del Ministeriu de Cultura o a los premios nacionales por nun ser oficial o que los profesores de 'Llingua asturiana' son interinos al nun haber especialidá docente, «porque la llexislación establez que namás hai especialidá docente pa los idiomes oficiales».

«El Ministeriu lo que diz ye que tenemos que facer oficial l'asturianu», afirmó, pa sentenciar que pa pensar nel futuru del asturianu «esto pasa por xubir un grau más l'estatus de protección del asturianu, que ye la reforma del Estatutu y la oficialidá». Una oficialidá que, dixo, va adaptase a la realidá social de la comunidá autónoma y que va tar «planteada a la carta de la sociedá asturiana ensin imposiciones»; informó Europa Press.