La cámara aprobó una proposición presentada de manera conxunta por Foru y IX p'ameyorar la presencia de les asignatures n'ESO y Bachilleratu
09 feb 2022 . Actualizado a las 17:03 h.La Xunta Xeneral aprobó, colos votos a favor de Foru, IX, PP, Ciudadanos, Podemos y Vox, y l'astención del PSOE, una Proposición Non de Llei sobre midíes p'ameyorar la presencia de les asignatures d'estudios clásicos n'ESO y Bachilleratu.
La iniciativa, presentada de manera conxunta por Foru y IX, pon de manifiestu la importancia de «caltener nes aules la cultura clásica, el griegu y el llatín, afitando asina la cultura y valores dientro de los raigaños comunes europeos».
Los grupos proponentes reclamaron que se «blinde» la presencia d'estos estudios nel diseñu curricular autonómicu nuevu, «garantizando'l derechu de tol alumnáu a poder cursar estes asignatures n'igualdá de condiciones y asegurando la sostenibilidá de les places docentes».
Ente les midíes contemplaes na iniciativa figuren que n'Educación Secundaria y Bachilleratu nun exista ratio mínima d'alumnos pa cursar Cultura Clásica, Llatín y Griegu; y que se llimite'l númberu d'optatives que compiten cola Cultura Clásica y s'estudie la posibilidá d'establecela como obligatoria nun cursu del primer ciclu de Secundaria.
Coles mesmes, contempla que s'estudie la posibilidá de convertir Llatín n'asignatura común en 4u de la ESO pa que valga de puerta d'entrada al Bachilleratu d'Humanidaes; que nel Bachiller d'Humanidaes se cree una vía qu'incluya Griegu y Llatín como materies específiques de modalidá; y que dientro del Bachiller Xeneral s'introduza «polo menos una vía» qu'ufierte materies del campu de clásiques; informó Europa Press.