El plenu aprueba que el Principau negocie la transferencia col apoyu de PSOE, Cs, Podemos, IX y Foro
24 feb 2022 . Actualizado a las 13:30 h.El plenu de la Xunta Xeneral aprobó esti miércoles una proposición non de llei d'IX p'apurar al Gobiernu del Principáu a negociar la tresferencia de les competencies en materia d'agües fluviales.
La iniciativa, qu'incorporó una enmienda socialista y una transaccional, cuntó col apoyu de PSOE, Ciudadanos, Podemos, IX y Foru y defendióla'l diputáu d'Izquierda Xunida, Ovidio Zapico, que xustificó la tresferencia de competencies «pa garantizar un estáu bonu de caltenimientu» y evitar problemes «recurrentes» coles aveníes que se producen anualmente.
Zapico valoró les enmiendes presentaes y destacó el consensu pa dar un plazu de 11 meses al Principáu pa qu'informe na Cámara sobre la negociación col Gobiernu central.
Dende Podemos, la diputada Nuria Rodríguez avanzó'l respaldu de la so formación a la iniciativa, defendiendo que se xestiona meyor les competencies dende la cercanía.
Pal portavoz de Foru, Adrián Pumares, ye un tema qu'afecta a munchos conceyos y residentes de zones riberanes, y considera necesario que'l Gobiernu d'Asturies negocies les tresferencies p'asumir la xestión nel periodu de tiempu más curtiu posible.
El diputáu de Ciudadanos Luis Fanjul considera que tendría que ser yá una materia tresferida y nun ve inconveniente en que pueda haber dos organismos regulando cuenques hidrográfiques, anque reclama la tresferencia llegue con «suficiencia financiera».
Per otru llau, el socialista Ángel Ricardo Morales animó a encarar les negociaciones con «prudencia y responsabilidá», matizando que la tresferencia de competencies llíndase a los calces intracomunitarios, ensin poder tomar les cuenques de los ríos Eo, Navia, Seya, Cares y Deva.
El portavoz de Vox, Ignacio Blanco, avanzó'l votu contrariu del so grupu, refugando competencies nueves qu'afonden nel «egoísmu» al considerar que l'agua d'Asturies nun ye namás de los asturianos sinón un recursu « de tolos españoles». Coles mesmes, afirmó qu'hai otres competencies tresferíes al Principáu que nun se tán executando.
P'acabar, la diputada del PP Cristina Vega negó l'apoyu a la iniciativa, incidiendo en que nun se pue pensar n'asumir competencies pol «fechu d'asumiles», encamentando a ameyorar la xestión col costu menor pa la ciudadanía.
Según Vega, los principales ríos que xeneraron problemes de llenes nun camudaríen de titularidá, que va siguir siendo estatal, como l'Eo y el Navia (que nacen en Galicia), el Seya (que naz en Llión) y tamién dixo'l Nalón (que naz en Casu) como si naciera en Llión. «Asturies namás asumiría competencies en pequenos ríos, como'l Esva, Aboño o Guadamía», señaló, informó Europa Press.