Ayeri 8 de marzu, Día Internacional de la Muyer, recordóse otru añu más que la desigualdá de xéneru entá ye una realidá en tol mundu y que, magar que la equidá va algamándose pasín a pasín en dellos países, queden entá demasiaes inxusticies por superar y munchos pasos que dar pa llograr una verdadera igualdá. Tando asina les coses, tanto ayeri, como güei, y como tolos díes del añu, debíemos poner en relieve la necesidá de reivindicar y lluchar escontra la desigualdá ente homes y muyeres, la importancia de tomar midíes p’acabar cola llácara de la violencia machista y, como non, visibilizar a les muyeres que llucharon por esa igualdá, como lo fizo la filósofa y escritora Flora Tristán. Ensin embargu l'equipu de gobiernu, integráu por PP y Ciudadanos y col alcalde al mandu, el señor Canteli, nun tán d’alcuerdu con esa postura yá qu’eliminaron los nomes d’once muyeres del caleyeru. La única esplicación d’esa sectaria y vengativa postura ye que, anque choque a esgaya, entá nel sieglu XXI los políticos de dereches siguen sintiendo «aversión a la igualdad».
Flora Tristán foi una muyer con un pensamientu formáu de múltiples tradiciones filosófiques nes que tán el socialismu utópicu, el feminismu ilustráu y el romanticismu. Sicasí, la complexidá y la riqueza de la so aportación teórica y los sos estudios feministes nun recibieron l'atención que merecíen. Choca esta indiferencia teniendo en cuenta la importancia de la so aportación teórica, la orixinalidá y relevancia de los escritos y los temes escoyíos, que siguen siendo claves pa la llucha pola emancipación de la muyer. De fechu, el so nietu, el pintor Paul Gauguin, dicía que-y resultaba complicao distinguir si lo que se conocía de so güela yera real o ficticio ya que corríen estremaes histories sobre ella y la so trayectoria, inclusive hasta depués de la so muerte.
Flora lluchó pola emancipación de los trabayadores (foi creadora de la conseña «proletarios del mundu, xuníos») y pola emancipación de la muyer, convirtiéndose asina na primer muyer en falar del socialismu y de la llucha de los proletarios. Ella caltuvo un compromisu irreductible a favor de los desheredaos polo qu’entamó una campaña favoratible a los derechos de los trabayadores y de la emancipación de la muyer. Defendía que «na vida de los obreros la muyer ye too» y por eso encamentába-yos a que ficieren la so llucha pola igualdá: «A vosotros los obreros, que sois les víctimes de la desigualdá dafechu y de la inxusticia, tócavos establecer, a la fin, sobre la tierra'l reinu de la xusticia y de la igualdá absoluta ente l'home y la muye. (…) En nome del vuesu propiu interés, homes; en nome de la vuestra meyora, en nome del bienestar universal de toos y de toes invítovosa reclamar los derechos pa la muyer».
Ello ye que les sos amargues vivencies espierten en Flora un pensamientu y una actitú combativa que-y valió pa lliberase de les opresives normes sociales y xurídiques que-y tocó vivir. Pasín a pasu garró conciencia de la so condición de «paria» respeuto a la so familia; foi desheredada porque nun consideraron llegal el matrimoniu de los so pas. Tamién foi una paria respeuto al so home, que nun duldó en dispara-y nel pechu nuna cai de Paris, noticia que foi primera plana de los medios sensacionalistes. Una agresión presentada como un «actu de xusticia», ya que nel xuiciu defendióse que’l so home pretendía protexer a la so propia familia y a otres families del contaxu. Emplegóse la obra lliteraria de Tristán pa demostrar la conducta llicenciosa de la escritora na que criticaben que facía apoloxía de la bigamia por reclamar el divorciu y el derechu de les muyeres a entamar una nueva vida amorosa. Magar que la xusticia intentaba acusala anque yera una víctima, a lo cabero llogró la separación llegal del so home y la custodia de los sos fíos.
Flora Tristán, una muyer que ñació en 1803 en plena época napoleónica na que se negaben a les muyeres tantos derechos, como llamentablemente entá sigue negándose en dellos países na actualidá, nun entendería el porqué depués de más de 200 años del so nacimientu, un alcalde d’una ciudá española, Uviéu, nun la quier nes soscais, como tampoco quier a otres muyeres que como ella fueron precursores de la igualdá. Namás s’esplica porque empleguen una «violencia machista institucional» porque a algunes instituciones de dereches nun-yos presta la igualdá.
Choca tamién que traten de xustificar la so decisión diciendo que «a futuru» va haber más nomes femeninos nel caleyeru d’Uviéu, un futuru nel que tampoco quieren cuntar con una de les pioneres más relevantes del feminismu y que lluchó polo sos ideales nunes circunstancies mui difíciles. Los que nun escaecieron a Flora, nin los sos ideales, nin la so llucha y quixeron que siempres tuviere presente, fueron los obreros, polo qu’en 1848, cuatro díes depués de la so muerte con malpenes 41 años, dedicáron-y un monumentu qu'asitiaron na so tumba en Burdeos y más d’ocho mil persones entamaron una marcha n'honor a los sos ideales. Y nun yera pa menos; la pensadora feminista que dixo que «na vida de los obreros la muyer ye too», ratificólo cola so propia esistencia.
Pese a la postura retrógrada de los partíos de dereches del consistoriu d’Uviéu, millones de muyeres en tol mundu salieron ayer, y van siguir saliendo tolos años, nel Día de la Muyer y nos momentos que se precise, pa refugar la violencia y pidir la igualdá de xéneru, como asina fizo na so dómina Flora Tristán.