«La realidá demuestra que'l marcu llegal del asturianu ye insuficiente», afirma la XDLA sobre'l non a la especialidá
AGORA
Nel cursu 2020/2021 foron 278 los profesores d'asturianu y gallego-asturianu que tuvieron nel aula ensin tener reconocida la especialidá de l'asignatura qu'imparten, lo que fai que nun puedan opositar
24 mar 2022 . Actualizado a las 11:23 h.El portavoz de la Xunta pola Defensa de la Llingua Asturiana (XDLA), Xosé Candel, afirmó esti xueves que «la realidá sigue demostrando una vez y otra que'l marcu llegal actual de la llingua asturiana ye insuficiente».
El portavoz de la XDLA posicionóse asina en referencia a que'l Ministeriu d'Educación tresmitiera al Principáu que, anque van estudiar les posibilidaes, nun existe marcu llegal pa reconocer la especialidá docente pal profesoráu d'asturianu al nun ser llingua oficial.
«La realidá sigue demostrando una vez y otra que'l marcu llegal actual ye insuficiente. El Gobiernu sábelo, pero empéñase en facer como si nun pasara nada», afirmó Candel, pa esplicar que'l decretu d'especialidaes «ye claru».
La especialidá d'asturianu esixe un cambiu nos reales decretos d'especialidaes, que son competencia del Ministeriu. Nellos, tendría qu'establecese que se pue aprobar la especialidá docente pa llingües qu'anque nun son oficiales tienen protección llegal y una política llingüística desarrollada pola comunidá autónoma, como ye'l casu de la llingua asturiana.
Candel indicó qu'hai especialidá pa cada una de les llingües oficiales y qu'a pesar de que se produciera esi cambiu llegal, ensin oficialidá «tampoco diba evitase la precariedá del profesoráu, que ta mayormente a media xornada».
Per otru llau, dende la XDLA valoraron positivamente la Proposición Non de Llei (PNL) presentada por Podemos pa que la Xunta Xeneral inste al Conseyu de Gobiernu a rexistrar una propuesta de reforma del Estatutu d'Autonomía que recueya la oficialidá del asturianu y del gallego-asturianu.
Nesi sentíu, asitió la responsabilidá del 'non' del Ministeriu a la especialidá nel Grupu Parllamentariu Socialista. "Venti diputaos y diputaes qu'apoyen al gobiernu y qu'empara de mandar a les sos conseyeres a facer el ridículu al Ministeriu habíen entamar la reforma del Estatutu d'Autonomía", sentenció.
En total, nel cursu 2020/2021 foron 278 los profesores d'asturianu y gallego-asturianu que tuvieron nel aula ensin tener reconocida la especialidá de l'asignatura qu'imparten, lo que fai que nun puedan opositar, estabilizar la so plaza o facer un concursu de tresllaos.
En Primaria, les asignatures de Llingua Asturiana y Lliteratura y de Gallego-Asturianu ufiertáronse nel cursu 2020-2021 nun total de 227 escueles d'enseñanza pública (98,7%) y en 42 centros de la rede concertada (84%), lo que supón un númberu total de 17.464 estudiantes. N'ESO y Bachilleratu ufiertóse nun total de 79 centros públicos (92,9%) y 25 privaos (49%), con una cifra total de 4.539 alumnos, informa Europa Press.