El proyectu forma parte de les acciones de promoción y defensa de la cultura sidrera, que ye candidata a convertise en patrimoniu inmaterial de la Unesco
05 abr 2022 . Actualizado a las 16:23 h.El Gobiernu d'Asturies llanzó la campaña 'La sidra, como siempre se dixo', una iniciativa que pretende dar a conocer ente la ciudadanía'l vocabulariu específicu vinculáu a la cultura sidrera, caracterizáu por términos y espresiones n'asturianu.
Según informó'l Gobiernu asturianu, el proyectu forma parte de les acciones de promoción y defensa de la cultura sidrera, que ye candidata a convertise en patrimoniu inmaterial de la Unesco.
La conseyera de Cultura, Política Llingüística y Turismu, Berta Piñán, y el director xeneral de Política Llingüística, Antón García, presentaron la iniciativa nel Muséu de la Sidra de Nava.
Ellí destacaron que'l vocabulariu específicu pa llamar a cada elementu del procesu d'ellaboración y consumu de la sidra ye una parte fundamental de la so identidá y da-y orixinalidá y especificidá.
Amás, la imaxe central de la campaña ye un homenaxe del dibuxante Ernesto García del Castillo, Neto, al popular cartel '¿Qué tien la sidra?', realizáu hai más de 40 años por Elías Antonio Garrido Barrientos (1933-2019), conocíu como Garrido.
El recuerdu consiste na actualización de la ilustración cola incorporación de la realidá social asturiana actual y ensin perder la esencia, la tradición y l'humor qu'utilizó l'autor pa representar la cultura sidrera.
D'esta manera, los personaxes del cartel faen comentarios sobre la sidra que tán bebiendo y utilicen dalgunes de les espresiones tradicionales qu'existen n'asturianu pa valorar la nuestra bebida más típica..
Cultura va distribuyir ente les sidreríes el cartel, con folletos col palabreru sidreru. Ta previsto repartir 60.000 folletos y 2.000 cartelos per tol territoriu, qu'inclúin una versión del folletu en galleo-asturianu pa la zona occidental; informó Europa Press.