Barbón diz que reconcer la especialidá docente pasa «definitivamente» pela oficialidá
04 may 2022 . Actualizado a las 12:35 h.El presidente del Principáu d'Asturies, Adrián Barbón, aseguró esti miércoles que la solución pal profesoráu d'asturianu, que nun tien especialidá docente reconocida, pasa «definitivamente» pela oficialidá del asturianu y el gallego-asturianu, y na Xunta Xeneral, «nun hai» los votos necesarios pa reformar l'Estatutu d'Autonomía y declarar la oficialidá.
Barbón respondió nestos términos al portavoz de Podemos, Rafael Palacios, que pidió al presidente que se posicione sobre la «discriminación llaboral» de los profesores de llingua asturiana y gallego-asturianu. El dirixente autonómicu aseguró que comparte esta premisa, y esplicó que l'Executivu va siguir «perseverando» na consecución de la oficialidá pa que'l Gobiernu estatal apruebe la especialidá.
El presidente esplicó que, si nun hai tovía'l reconocimientu d'esta especialidá, ye porque existe un reparu d'Abogacía del Estáu, que pon la condición de l'aprobación de la oficialidá del asturianu nel parllamentu autonómicu.
Barbón mostró'l so apoyu al colectivu de 250 profesores que sufren esta «discriminación histórica» que-yos torga d'acceder a oposiciones «como'l restu» al nun tener especialidá.
Per otru llau, el portavoz de Podemos, Rafael Palacios, pidió al presidente qu'impulse «toles actuaciones que sían menester» pa que se cree la especialidá y poner fin a «trés décades de discriminación del profesoráu». Pa eso, pidió al Executivu que trabaye pa que'l profesoráu d'asturianu y gallego-asturianu tea nes plantiyes orgániques.
A les puertes de la manifestación pola oficialidá del 7 de mayu, Palacios señaló que se tendría que poder falar «con normalidá» cualesquier de les llingües, ensin obligar a naide pero tampoco discriminar, informó Europa Press.