La Rexenta, axente secreta, enfréntase a Drácula na nueva novela d'Adrián Carbayales
AGORA
Vetusta ye l?escenariu d?esti enfrentamientu míticu ente dos clásicos de la lliteratura universal
07 jun 2022 . Actualizado a las 17:35 h.Vetusta y non otra ciudá ye l’escenariu d’esti enfrentamientu míticu ente dos clásicos de la lliteratura universal: La Rexenta y Drácula. Según la novela d’Adrián Carbayales, lo que lleímos na clásica novela «La Rexenta» foi una mentira del axente secretu Leopoldo Alas, nome en clave «Clarín», espertu propagandista d’una asociación secreta p’atapar l’enfrentamientu ente l’axente secreta Ana Ozores, nome en clave «La Rexenta» y Drácula, qu’intentó corromper a Vetusta na seronda de 1882.
Na novela d’Ediciones Radagast, Adrián Carbayales trespórtanos a una Vetusta de finales del sieglu XIX onde Drácula ta corrompiendo a l’aristocracia llocal al traviés de fiestes, orxíes y ritos nuevos. Frente a ello, Ana Ozores habrá d’enfrentase a la criatura non-muerta pa intentar salvar la ciudá de Vetusta y les vieyes tradiciones. Estrada de referencies tanto a les dos obres clásiques como a les adautaciones al cine y a munches obres más, esta novela cuenta l’enfrentamientu ente Drácula y La Rexenta hasta acabar con un desenllaz inesperáu.
Un debate lliterariu ente llinies
Lo cierto ye que detrás de la filaza principal Adrián Carbayales mete una doble llectura y diz a les clares que nesta novela nun se va atopar namás l'enfrentamientu físicu ente los dos clásicos lliterarios sinón tamién l'alegóricu ente dos maneres d'entender la lliteratura: ¿Tien que ser la lliteratura una referencia culta o buscar el favor del gran públicu? ¿Hai que siguir apostando polo rural o hai que facelo pola fantasía y la ciencia ficción? ¿Hai que siguir apostando por ritmos lentos y posaos o por narratives más frenétiques? Ye ésti un alderique que ta más vivu que nunca nes lletres asturianes onde la crítica, polo xeneral benévola, nun dulda en facer sangre escontra la nueva lliteratura que tán faciendo los más mozos.
Adrián Carbayales
Adrián Carbayales, nacíu en Madrid en 1985 de familia asturiana que vive anguaño n’Uviéu, debuta con esti llibru, qu’anque sí ye la so primer novela publicada, nun ye la primer obra de narrativa que fai: Va pocos díes remató l’oxetivu d’algamar financiamientu pa «Tiempu de Lleendes» el que ta llamáu a ser el primer videoxuegu fechu 100% n’asturianu.