«Nun vamos aceptar la votación por puntos y que nos llamen demagoxos, voten ustedes con Vox» dixo Rafael Palacios
10 jun 2022 . Actualizado a las 10:37 h.PSOE, PP, Ciudadanos y Vox votaron en contra d'una Proposición Non de Llei (PNL) de Podemos pa instar al Principáu a reclamar al Estáu la creación de la especialidá docente d'asturianu o, nel so casu, qu'esti facultara a l'autonomía a ponela en marcha «en condiciones d'igualdá coles otres especialidaes llingüístiques».
La PNL, votada esti xueves na Comisión de Cultura, Política Llingüística y Turismu de la Xunta Xeneral, tamién pretendía instar al Conseyu de Gobiernu a incluyir les places de les especialidaes de llingua asturiana y gallego-asturianu nes plantiyes orgániques y nos procesos d'estabilización llaboral y establecer la ufierta obligatoria en tolos niveles educativos, amás de nes Escueles d'Idiomes.
Según la diputada del PSOE, Mónica Ronderos, estos dos últimos puntos nun se puen llevar alantre al ser competencia estatal, polo qu'acusó a Podemos de «demagoxa» y d'actuar con «falta de rigor». Recordó'l compromisu de la FSA cola oficialidá y qu'esta nun salió alantre polos qu'introducieron midíes fiscales nel debate, p'afirmar que de llevar alantre un procesu d'estabilización del profesoráu ensin esti marcu llegal, la xusticia podría anulalo. «Nun podemos encamentar al Gobiernu asturianu a facer dalgo fuera de norma», indicó.
Por eso, reclamó a Podemos que permitiera una votación puntu por puntu pa poder apoyar el que reclamaba la creación de la especialidá y refugar asina los otros dos. «Nun vamos aceptar la votación por puntos y que nos llamen demagoxos, voten ustedes con Vox», foi la respuesta que dio'l diputáu de Podemos Asturies, Rafael Palacios.
Per otru llau, votaron a favor de la PNL IX y Foru Asturies. En nome de los primeros, Ángela Vallina dixo que la especialidá ye esencial pa evitar la discriminación, pero la falta d'oficialidá impide la estabilidá de los profesores y cuestiones como nun reconocer los sos méritos. «Una situación inaceptable», afirmó.
Dende Foru Asturias, Adrián Pumares, recordó que'l PP llevó nel 2009 a la Xunta Xeneral una midida asemeyada, momentu nel que'l PSOE taba en contra. «Por fortuna, la mayoría de los grupos parllamentarios coincidimos agora nesa necesidá», dixo, anque criticó'l qu'al so xuciu ye un cambiu de postura nel Gobiernu rexonal, que na llexislatura pasada defendía la posibilidá de crear la especialidá d'asturianu ensin oficialidá y agora diz que ye un marcu necesariu.
Dende'l PP, la diputada Gloria García reconoció que'l profesoráu d'asturianu ta «en condiciones mui precaries», pero indicó qu'hai coses que vienen d'arriba. «Solicitóse la especialidá al Ministeriu y el so Gobiernu negóse», afirmó, pa indicar que les soluciones que propón Podemos nun son viables. Con too, señaló que pal cursu que vien sí que se puen tomar mididas como mandar a los centros el profesoráu que faiga falta, dalgo qu'afirmó que nun se ta faciendo agora.
Otra manera, dende Ciudadanos, Armando Bartolomé tamién reconoció qu'hai un problema na situación d'estos profesores qu'hai que resolver. «La oficialidá allanaría la solución a estos problemes», dixo Bartolomé, que criticó la politica d'interinidá y el «tira que llibres» qu'al so xuiciu siguió'l PSOE nesta cuestión.
P'acabar, dende Vox, Sara Rouco criticó la «imposición» del asturianu nes escueles y afirmó qu'en Primaria l'alternativa a l'asignatura de 'Llingua asturiana' ye 'Cultura asturiana', «polo que de manera indirecta yá ye obligatoria y impónse una llingua inventada cola finalidá de mantener los sos chiringos».