Asturies nun va ser una esceición nel cambéu climáticu. A lo cabero del añu pasáu tuvimos un pequeñu diluviu -colos sos argayos correspondientes- y en venti díes llovió’l 30,6% de les precipitaciones esperaes pa tol añu. La selmana pasada en dellos llugares como Cabranes la temperatura pasó de los 39 ºC mentanto otros como Uviéu, Llangreu y Cangas de Narcea, superaron los 35 ºC, y entá tamos na primavera. La Organización Meteorolóxica Mundial (OMM) alvierte que l’actual fola de calor n’Europa occidental, que traxo temperatures superiores a los 40 ºC en países como España o Francia, «ye un anticipu del futuru», el cambéu climáticu provoca que les foles de calor entamen enantes y seyan más frecuentes y severes por cuenta de les concentraciones récor de gases d'efeutu ivernaderu.
L’amplia mayoría d’españoles tán esmolecíos pol cambéu climáticu. Una encuesta ellaborada pol Institutu DYM diz que pal 50 % de los encuestaos -el 44 % de los mozos ente 18 y 24 años- considera que yá ye demasiao tarde. Seya tarde o non lo que va trayer son consecuencies enforma negatives. L’últimu informe d'evaluación asoleyáu pol Grupu Intergubernamental d’Espertos sobre’l Cambéu Climáticu la selmana pasada bien a redordanos que, anque’l cambéu climáticu afeuta a tol mundu, nun lo fai por igual. La vulnerabilidá al cambéu climáticu vese agravada pola desigualdá y la marxinación venceyaes al sexu, la procedencia, los baxos ingresos y otros factores socioeconómicos. Toles comunicaciones señalen que los fenómenos meteorolóxicos estremos por mor del cambéu climáticu afeuten de forma desproporcionada a les muyeres y les neñes, y a la so capacidá pa facer les sos labores diarios, lo qu’esplica en parte que delles neñes se vean obligaes a dexar la escuela. Según les aportaciones del Centru de Xinebra pa la Gobernanza del Sector de la Seguridá, la violencia de xéneru ye frecuente nes zones de conflictu que, d’igual miente, tamién cuerren más riesgu de sufrir fenómenos meteorolóxicos estremos. Por casu, les muyeres y les neñes de Colombia, Malí y Yemen cuerren un riesgu especial de sufrir violencia de xéneru por cuenta de la combinación de los efeutos del cambéu climáticu, la degradación del mediu ambiente y los conflictos.
El matrimoniu infantil, consideráu tamién un actu de violencia contra les neñes, arreglóse en delles comunidaes como mediu pa facer frente a los desastres, según les comunicaciones. En Bangladex, Etiopía y Kenia, por casu, el matrimoniu infantil ye una forma d’asegurar fondos o bienes y recuperar les perdes sufríes por cuenta de los desastres rellacionaos col clima, como la seca, le llenes repetíes y les truenes más intenses. La secretaria Executiva de la ONX Cambéu Climáticu. «Tenemos que cuntar cola participación de les muyeres, en tola so diversidá, en tolos niveles: sales de xuntes, negociaciones sobre’l clima, montes, campos, sobre manera nos sectores y rexones más afeutaos polos estragos del cambéu climáticu». Según un análisis del Boston Consulting Group, les actuales estratexes d’adautación a la crisis ambiental inda podríen retrasar la consecución de la igualdá de xéneru ente 15 y 20 años.
Y mentanto, el cambéu climáticu ta provocando que los penes mengüen de tamañu pola contaminación ambiental, según un estudiu científicu de la doctora Shana Swan, profesora de medicina ambiental y salú pública na Facultá de Medicina de Mount Sinai, en Nueva York, y ta alteriando’l desendolcu reproductivu de los humanos, daqué que ye una amenaza pal futuru de la nuesa especie. «En delles partes del mundu, la media de les moces que güei ronden los venti años son menos fértiles de lo que yera la so güela a los 35 años». El cambéu climáticu tamién impauta na nuesa salú mental: los especialistes y organismos como la Organización Mundial de la Salú (OMS) yá que provoca trestornos que van dende’l malestar emocional hasta l’ansiedá, la depresión, el dolor o les conductes suicides
Lo que ye preocupante ye que los partíos d’ultraderecha faigan chancia sobre esti tema cuando Rocío Monasterio fala del «camelu climáticu». Francisco José Contreras, diputáu de Vox nel Congresu, atrévese a dicir pal plasmu de los científicos que’l calentamientu global pue ser positivu porque amenorga les muertes por fríu. Per otru llau, el so presidente Abascal alvierte «que nun pue probase que l’home seya responsable del cambéu climáticu». En viendo esto, talamente paez que’l cambéu climáticu amás de mermar el tamañu del pene, tamién afeuta nel tamañu del cerebru y la intelixencia.