L'elementu central ye un videu que trata d'amosar la esperiencia d'un turista nel conceyu
22 jun 2022 . Actualizado a las 09:27 h.Ayer, atrévite a suañar ye l'eslogan de la campaña nueva de marketing qu'acaba de llanzar el Conceyu d'Ayer en redes sociales, col oxetivu principal de captar turismu nacional de cara a la temporada braniega. Esti mensaxe resume y tresmite los valores de la marca turística del destín Ayer, un llugar onde esquizar lo inesplorao te lleva a suañar.
La pieza clave d'esta campaña ye un videu d'un minutu de duración, producíu con un formatu documental, nel que'l protagonista, un viaxeru, afaya un territoriu nel que conecta colos sos oríxenes, un llugar nel que puede sentir la fuercia de la vida y nel que los suaños faense realidá. Col fin d'aumentar la visibilidá en canales online, esti spot incorpora una fras final col hashtag #AllerAtréveteaSoñar, que va ser utilizáu en toles publicaciones que se realicen en redes sociales.
La Conceyalía de Turismu apostó, una vegada más, por un videu modernu que ruempe colos clásicos spots de destinos turísticos, y qu'utiliza imáxenes atanantes pa conectar coles emociones del públicu y captar la so atención, col fin últimu de motivar la visita al conceyu.
L'acción trata sobre la esperiencia d'un turista n'Ayer y amuesa dalgunos de los aspectos que más valoren los turistes que visiten el conceyu: la so exuberante naturaleza, la estraordinaria guapura de los sos paisaxes y l'autenticidá del destín, y esto ye lo que trata d'amosar la campaña. Dalgunos de los escenarios naturales del videu que más llamen l'atención son el güeyu de güe de Peña Mea, el Pingarón de la Mornera, Foces d'El Pinu o la Cascada de Xurbeo, con tomes aérees qu'eponderen el grandor y la espectacularidá d'estos espacios naturales.
La conceyala de Turismu del Conceyu d'Ayer, Elena Zapico Pando, señala que «pal equipu de gobiernu la promoción turística del territoriu ye una prioridá y, por ello, diseñemos esta campaña nueva de márketing col enfotu d'asitiar Ayer como destín turísticu y d'atrayer visitantes del ámbitu nacional».