L'árbol que baltara l'acusáu cayó sobre un cable del tendíu eléctricu
22 jun 2022 . Actualizado a las 09:22 h.El Xulgáu de lo Penal númberu 2 d'Avilés va acoyer el xuiciu contra un trabayador acusáu de causar una quema forestal en Villayón dempués de que l'árbol que baltara cayera sobre un cable del tendíu eléctricu, fechos polos que la Fiscalía solicita nueve meses de prisión, indemnizaciones por importe de 18.000 euros y una multa de 3.240 euros.
La quema enpezó sobre les 12:00 hores del 5 de xunu de 2017 cuando l'acusáu, trabayador d'una empresa forestal, realizaba al pie d'otros dos compañeros llabores de balta de pinu y ocalitu nuna parcela nel conceyu de Villayón.
La Fiscalía rellata nel so escritu que l'acusáu baltó un árbol que se topaba dientro de la cai de seguridá d'una llinia de tresporte d'enerxía eléctrico de media tensión, de la empresa Viesgo Distribución Eléctrica, ensin adoptar les midíes de precaución necesaries, lo que provocó qu'empecipiara un fueu.
Les llapaes avanzaron con facilidá por cuenta de les condiciones de meteorolóxiques, orográfiques y de vexetación quemando una superficie total de 1,54 hectárees de restos de curtia d'ocalitu espardíos pel suelu, según 0,66 hectárees d'arboláu d'ocalitu, con exemplares aisllaos de pinu y carbayu, so los cualos vexetaba carba de toxu y felechu.
Bomberos de los parques de Valdés, Barres y La Morgal escastaron la quema a otru día, con ayuda del helicópteru, la cooperativa/empresa forestal Montevios y la Guardería de Mediu Rural.
Los costos d'estinción de los medios pertenecientes al Serviciu d'Emerxencies del Principáu d'Asturies xubieron a 16.977 euros y tolos propietarios de les parceles afectaes arrenunciaron a la indemnización que pudiera corresponde-yos.
Per otru llau, la llinia de suministru eléctricu de la compañía Viesgo Distribución Eléctrica SL permaneció ensin serviciu dende les 14:00 hores hasta les 16:50 hores del día 5 de xunu de 2017, causando perxuicios que fueron peritaos en mil euros.
La Fiscalía imputa al acusáu un delitu de quema forestal cometíu por imprudencia grave y pide que l'acusáu desquite económicamente los costos d'estinción al Principáu y los perxuicios causaos a Viesgo; unes indemnizaciones de les que va responder de manera directa la compañía aseguradora y, de forma subsidiaria, la mesma empresa forestal.