Los trabayos gallardonaos analicen la calidá del aire nel conceyu de Nava y l'usu de la intelixencia artificial aplicada a la clasificación fotográfica
28 jun 2022 . Actualizado a las 11:30 h.Alumnos del IES Peñamayor de Nava, con un trabayu sobre la calidá del aire nel conceyu, y del IES nu 5 d'Avilés, con un estudiu sobre la intelixencia artificial aplicada a la clasificación fotográfica, alzáronse colos premios de la fase asturiana del concursu Incubadora de Sondeos y Esperimentos que convoca cada añu'l Departamentu d'Estadística ya Investigación Operativa y Didáctica de la Matemática de la Universidá d'Uviéu.
El xuráu d'estos gallardones decidió otorgar el premiu na so categoría B, destinada a 3u y 4u d'ESO y FP Básica, al trabayu tituláu La calidá del aire en Nava, presentáu pol IES Peñamayor. Los alumnos distinguíos, tutorizaos pola profesora Cristina García García, son: Lucía Pruneda Canga, Unai Sánchez Lorenzo, Jairo Villa Ortega y Paola Suárez Robledo.
Según los miembros del xuráu, nesti trabayu, los autores utilizaron la información recoyida en distintes estaciones meteorolóxiques del conceyu, ellaboraes por alumnos del centru nel cursu anterior, pa estudiar la incidencia de contaminantes como'l dióxidu de carbonu o'l dióxidu d'azufre na calidá del aire, tanto dientro del so centru d'estudios, como n'otros puntos del conceyu.
Na categoría C, dirixida a estudiantes de 1u y 2u de Bachilleratu y Ciclos Formativos de Grau Mediu, el gallardón recayó nel trabayu Sesgos nos algoritmos basaos en machine learning: casu d'estudiu sobre clasificación d'imáxenes de distintos oficios, presentáu pol IES nu 5 d'Avilés. Los alumnos distinguíos, col profesor Daniel Sánchez Repullo como tutor, son Javier Blanco Sánchez. Adrián Mestas Bustamante, Aitor Pico García y Mateo Rama García.
Esti estudiu analiza cómo funciona'l procesu d'aprendizaxe d'una intelixencia artificial aplicada a la clasificación profesional d'individuos por imáxenes fotográfiques. De primeres, los alumnos entrenaron la intelixencia artificial con una serie d'imáxenes tipu nes qu'hai diversidá de races, sexos, ambientes de trabayu pa, darréu, utilizar esti aprendizaxe na clasificación d'un conxuntu nuevu d'imáxenes y analizar los resultaos d'ésitu y fracasu llograos en cada casu.
Los grupos ganadores de caúna de les categoríes representen a Asturies na undécima convocatoria de la fase nacional del concursu, que, anguaño, tien llugar en Toledo, na que van competir colos ganadores de les distintes fases autonómiques.
Orixinalidá y claridá
El xuráu señaló que, a la de decidir los ganadores, tuviéronse en cuenta aspectos como la orixinalidá del tema escoyíu, la claridá na esposición d'oxetivos, fases del proyectu y resultaos, la correcta aplicación de les técniques estadístiques emplegaes, les conclusiones y analís críticu del proyectu, l'informe final y l'anovación na presentación de los resultaos.
El concursu Incubadora de Sondeos y Esperimentos ta destináu a premiar trabayos d'Estadística y d'Investigación Operativa realizaos por alumnáu de los cursos d'Enseñanza Secundaria Obligatoria (ESO), Bachilleratu, Formación Profesional Básica y Ciclos Formativos Profesionales de Grau Mediu de los centros docentes del Principáu d'Asturies.
La finalidá d'esti concursu ye fomentar la enseñanza y aprendizaxe de la estadística nos niveles educativos non universitarios col enfotu de consiguir persones motivaes pa realizar estudios universitarios d'Estadística ya Investigación Operativa o, pelo xeneral, pa familiarizase cola recoyida y analís de los datos que pueden atopase nel mundu que nos arrodia; según la posterior toma de decisiones n'interpretando la información estadística contenida nellos. El concursu tamién busca fomentar l'espíritu críticu nel alumnáu non universitario.