La productora Beta Fiction Spain va rodar un llargumetraxe basáu nel llibru del asturianu Diego Díaz
28 jun 2022 . Actualizado a las 11:11 h.La vinculación de La Pasionaria, histórica dirixente comunista de la España del sieglu XX con Asturies nun ye pequeña, al so regresu del exiliu foi diputada pola comunidá, pero ye que tamién parte de la so figura política construyóse coles sos actives partipaciones nel escenariu de la represión tres la revolución del 34. Un historiador asturianu, Diego Díaz foi l'escritor de la so última biografía qu'agora salta a la pantalla.
La productora cinematográfica Beta Fiction Spain zarró un alcuerdu cola editorial Hoja de Lata pa rodar un llargumetraxe basáu nel llibru «Pasionaria. La vida inesperada de Dolores Ibárruri, escrita pol asturianu Diego Díaz.
L'adaptación del llibru va cuntar con guión d'Alejandro Hernández («Mientras dure la guerra» y «Los últimos de Filipinas») y Michel Gaztambide («No habrá paz para los malvados», «Vacas»), según anunció la editorial del llibru nuna nota.
Nuna entrevista concedida a La Voz de Asturias, l'historiador destacaba que «la represión posterior a 1934 empieza a convertila nun personaxe famosu» al poner en marcha'l comité Pro Infancia Obrera «que s'encarga de la evacuación de neños asturianos que teníen a los sos padres presos, muertos o nel paru pa llevalos de manera temporal con families d'otres partes d'España. Ehí empieza a forxase un pocu la lleenda de La Pasionaria».
La nota de la productora destaca que la película va tratar la trayectoria vital de la protagonista «una socesión de fitos, caú más increyible, que la llevó de nacer nuna familia conservadora de la cuenca minera de Vizcaya a ser secretaria xeneral del PCE (1942-1960) y única muyer nel buró central de la Internacional Comunista».